یُو ایس اوپن: فائنل میں سیرینا کا مقابلہ ووزنیاکی کے ساتھ

امریکی شہر نیویارک کے نواحی علاقے فلشنگ میڈوز میں واقع ٹینس کمپلیکس میں رواں برس کے چوتھے اور آخری گرینڈ سلیم ٹورنامنٹ یُوایس اوپن کے اختتامی مرحلے کے میچز جاری ہے۔ جمعے کو خواتین کے دو سیمی فائنل میچ کھیلے گئے۔ اِس کے علاوہ مکسڈ ڈبلز کا فائنل میچ بھی جمعے ہی کے روز مکمل ہوا۔ اس میچ میں بھارت کی ثانیہ مرزا اور اُن کے برازیل سے تعلق رکھنے والے ساتھی برونو سواریز نے کامیابی حاصل کی۔ مردوں کے دونوں سیمی فائنل میچ کل ہفتے کے روز کھیلے جائیں گے۔

جمعے کے روز امریکی ٹینس ایسوسی ایشن کے مرکزی ٹینس کمپلیکس کے سینٹر کورٹ آرتھر ایش اسٹیڈیم میں سب سے پہلے مکسڈ ڈبلز کا فائنل میچ کھیلا گیا۔ اُس کے بعد ویمن سنگلز کا پہلا سیمی فائنل میچ ڈنمارک کی کیرولین ووزنیاکی اور چین کی پینگ شوائی کے درمیان شروع ہوا۔ چینی کھلاڑی گرمی کی وجہ سے میچ مکمل کرنے سے قاصر رہیں۔ انہیں دوسرے سیٹ کے دوران وہیل چیئر پر بٹھا کر باہر لے جایا گیا۔ پینگ شوائی کو شدید گرمی سے پیدا ہونے والی علالت کا سامنا ہے اور رات گئے وہ خاصی سنبھل چکی تھیں۔ ان کو جب اسٹیڈیم سے باہر لے جایا گیا تو وہ آبدیدہ تھیں۔

کیرولین ووزنیاکی اور پینگ شوائی کے درمیان کانٹے دار میچ کا پہلا سیٹ بھی ووزنیاکی نے خاصی محنت سے جیتا۔ دونوں کھلاڑیوں نے چھ گیمز جیت لی تھیں اور بعد میں ٹائی بریک پر فیصلہ ہوا۔ دوسرے سیٹ میں ووزنیاکی نے چار اور پینگ شوائی نے تین گیمز جیتی تھیں کہ میچ کو روک دینا پڑا۔ اسی موقع پر چینی کھلاڑی میچ سے دستبرداری ہو گئیں۔ اس سیٹ میں ایک دفعہ شوائی کو باہر لے جایا گیا اور طبی امداد فراہم کی گئی لیکن جب وہ کورٹ میں واپس آئی تو مزید پانچ پوائنٹ تک کھیل جاری رکھ سکیں اور وہ دوبارہ جو علیل ہوئیں تو پھر انہوں نے مزید کھیل جاری رکھنے سے معذرت کر لی۔

ووزنیاکی کو ویمن سنگلز کے فائنل میچ میں امریکی اسٹار کھلاڑی سیرینا ولیمز کا سامنا ہے۔ سن 2009 میں ووزنیاکی یُو ایس اوپن کے فائنل میں ضرور پہنچی تھیں لیکن تب انہیں بیلجیئم کی کِم کلائسٹرز نے ہرا دیا تھا۔ سیرینا ولیمز اپنے اٹھارہویں گرینڈ سلیم ٹائٹل کی جُستجُو میں ہیں۔ سیمی فائنل میں انہوں نے روس کی ایکاٹیرینا ماکاروفا کو آسانی سے ہرا دیا۔ ولیمز نے سیمی فائنل میچ دو سیٹ میں جیتا۔ اگر اتوار کے روز ووزنیاکی فائنل جیت گئیں تو وہ پہلی مرتبہ گرینڈ سلیم ٹورنامنٹ جیتیں گی۔ دوسری جانب سیرینا ولیمز جیت گئیں تو یہ اُن کی یُو ایس اوپن میں چھٹی جیت ہو گی۔

مکسڈ ڈبلز میں بھارت کی ثانیہ مرزا اور برازیل کے برونو سواریز کو فیورٹ جوڑی قرار دیا گیا تھا۔ انہوں نے تین سیٹ کے فائنل میچ میں جیت حاصل کی۔ فائنل میں دوسری جوڑی امریکن ابیگیل سپیئرز اور میکسیکو کے سنتیاگو گونزالیز کی تھی۔ اس کامیابی کے بعد ثانیہ مرزا اب تک تین گرینڈ سلیم مکسڈ ڈبلز کے فائنل جیت چکی ہیں۔