یوکرائن کے اپوزیشن رہنماؤں کی میرکل سے ملاقات

اپوزیشن رہنما آرسینی یاٹسینی یُک اور سابق باکسنگ ورلڈ چیمپیئن ویٹالی کلچکو کی چانسلر انگیلا میرکل سے پیر کی ملاقات کو یوکرائن کی اپوزیشن کے لیے جرمن حمایت کے اشارے کے طور پر دیکھا جا رہا ہے۔ تاہم خبر رساں ادارے روئٹرز کے مطابق اس دوران میرکل نے یوکرائن کے صدر وکٹر یانوکووچ پر فوری پابندیوں کے لیے اپوزیشن کے مطالبے کی حمایت نہیں کی ہے۔

یوکرائن کی اپوزیشن یورپی یونین پر زور دیتی آ رہی ہے کہ وہ لفظی حمایت سے آگے بڑھتے ہوئے ان کے ملک میں جمہوریت کے لیے ان کا ساتھ دے۔

یاٹسینی یُک اور کلچلو نے میرکل سے ملاقات کے بعد جرمن پارلیمنٹ میں ایک نیوز کانفرنس سے خطاب بھی کیا۔ اس موقع پر انہوں نے میرکل سے بات چیت پر اطمینان کا اظہار کیا۔ جب ان سے پوچھا گیا کہ یانوکووچ پر پابندیوں کے ان کے مطالبے پر میرکل کا کیا ردِ عمل تھا تو کلچکو نے کہا: ’’تمام پہلو زیرِ غور ہیں۔‘‘

جرمن حکمران جماعت کے ایک اعلیٰ سیاستدان آندریاس شوکینہوف کا کہنا ہے کہ یوکرائن کی اپوزیشن اور یانوکووچ کے درمیان مصالحت کا حقیقی موقع موجود ہے۔ انہوں نے کہا: ’’پابندیاں متعارف کروانا درست نہیں ہو گا، لیکن پابندیاں خارج ازامکان نہیں ہیں۔‘‘

یاٹسینی یُک نے کہا: ’’ہمیں پورا یقین ہے کہ ہم اس ڈرامائی اقتصادی بحران کو حل کرنے کی صلاحیت رکھتے ہیں۔ یوکرائن کے عوام اپنی آزادی کے لیے لڑ رہے ہیں اور ہم فتح تک لڑائی جاری رکھیں گے۔‘‘

یوکرائن میں یہ بحران گزشتہ برس نومبر سے جاری ہے۔ عوام کا ایک حلقہ صدر وکٹر یانوکووچ کی جانب سے یورپی یونین کے ساتھ ایک معاہدے کو ردّ کرنے پر نالاں تھا جو احتجاج کے لیے سڑکوں پر نکل آیا۔ بعدازاں یہ مظاہرے یانوکووچ کو اقتدار سے بے دخل کرنے کی تحریک کی شکل اختیار کر گئے۔

یانوکووچ یورپی یونین کے بجائے روس کے ساتھ قریبی تعلقات چاہتے ہیں۔ یورپی یونین کے خلاف ان کے فیصلے کے ردِ عمل میں ہونے والے مظاہروں کو 2004ء کے نارنجی انقلاب کے بعد ہونے والا سب سے بڑا احتجاج قرار دیا گیا ہے۔

یوکرائن کے صدر وکٹر یانوکووچ آرسینی یاٹسینی یُک اور ویٹالی کلچکو کو وزیر اعظم اور نائب وزیر اعظم کے عہدوں کی پیشکش بھی کر چکے ہیں۔ خیال رہے کہ یورپی رہنما فریقن پر زور دیتے آئے ہیں کہ وہ برداشت کا مظاہرہ کریں۔