یونان میں یورو کی حامی جماعتیں حکومت کے قیام پر متفق

یورپی ممالک کا موقف ہے کہ یونان یورو زون کا حصہ صرف اسی صورت میں رہ سکتا ہے جب وہ یورپی یونین اور بین الاقوامی مالیاتی فنڈ کے ساتھ طے کردہ بیل آؤٹ ڈیل پر مکمل طور پر عمل درآمد کرے تاہم یہ ڈیل یونان میں خاصی غیر مقبول ہے۔

بدھ کے روز یورو زون میں موجود رہنے کی حامی جماعتوں کے درمیان ہونے والے مذاکرات کے بعد سیاسی رہنما اس بات پر متفق ہیں کہ یونان کو دیوالیہ پن سے بچانے کے لیے یورپی یونین اور آئی ایم ایف کی جانب سے دی جانے والی مالی امداد کے لیےکی جانے والی سخت ترین بچتی اصلاحات کی ڈیل پر نظرثانی کی کوششیں کریں گے۔ بتایا جا رہا ہے کہ اتحادی جماعتوں کی جانب سے انتونیس ساماراس کو وزارت عظمیٰ کا عہدہ سونپا جا رہا ہے اور وہ اپنے عہدے کا حلف آج ہی اٹھائیں گے۔

ساماراس قدامت پسند نیو ڈیموکریسی پارٹی کے سربراہ ہیں۔ ان جماعتوں نے مذاکرات میں اس عزم کا اظہار بھی کیا ہے کہ یونان کو مالیاتی بحران سے نکالنے اور معیشت کی بحالی کی بھرپور کوششیں کی جائیں گی۔

انتونیس ساماراس کے ساتھ تین روزہ ملاقات کے بعد سوشلسٹ پوسوک پارٹی کے رہنما ایوانگیلوس وینیزیلوس نے کہا، ’یونان میں اب حکومت ہے۔‘

اگلے ہفتے برسلز میں یورپی یونین کے سربراہ اجلاس کا حوالہ دیتے ہوئے وینیزیلوس نے کہا، ’برسلز میں دو دن ہم قرضوں پر نظرثانی اور اس ڈیل کی شرائط پر دوبارہ بات چیت کی لڑائی لڑیں گے تاکہ ملک معاشی بحالی کی جانب گامزن ہو اور یونان میں بے روزگاری میں اضافے کو روکا جا سکے۔‘

انہوں نے کہا کہ یونان میں حکومت سازی کے لیے حتمی مراحل بدھ کی شام تک طے کر لیے جائیں گے اور اس میں سوشلسٹ پارٹی اور قدامت پسند جماعت کے ساتھ ساتھ ڈیموکریٹک لفٹ پارٹی بھی شامل ہو گی۔ ’’حکومت میں ذمہ داریوں کے بوجھ کی مساوی تقسیم کا اصول سامنے رکھا جائے گا۔

at / ia (AFP, Rueters)