یورپی یونین کا بچوں کی آن لائن حفاظت کے لیے نیا اقدام

یورپی یونین میں بچوں اور نوجوانوں کو انٹرنیٹ پر نامناسب اور بالغوں کے لیے مخصوص مواد سے بچانے کے لیے  عمر کی تصدیق کا ایک نیا ڈیجیٹل نظام متعارف کیا جائے گا۔

یورپی کمیشن کی جانب سے جاری کردہ ایک بیان میں کہا گیا ہے کہ عمر کی تصدیق کے لیے ایک نئی ایپ کا پروٹوٹائپ تیار کر لیا گیا ہے، جسے ابتدائی طور پر ڈنمارک، فرانس، اسپین، یونان اور اٹلی میں متعارف کرایا جائے گا۔ اس ایپ کے ذریعے صارفین کی عمر کی تصدیق ان کی ذاتی معلومات جیسے نام یا تاریخ پیدائش محفوظ کیے بغیر گمنام طور پر کی جائے گی۔

اس حوالے سے طویل المدتی منصوبہ یہ ہے کہ اس ٹیکنالوجی کو یورپی یونین کے ڈیجیٹل شناختی کارڈ (eID) میں شامل کیا جائے، جو 2026ء کے آخر تک دستیاب ہو گا۔

ڈنمارک، جو اس وقت یورپی یونین کی کونسل کی صدارت کر رہا ہے، اس معاملے پر پیش رفت کا خواہاں ہے۔ ڈنمارک کی وزیر برائے ڈیجیٹل امور کیرولین اسٹیج اولسن نے کہا، ''بچوں کا محفوظ ڈیجیٹل بچپن ضروری ہے۔ عمر کی درست تصدیق کے بغیر ہم بچوں کی آن لائن حفاظت نہیں کر سکتے۔‘‘

یورپی کمیشن نے آن لائن پلیٹ فارمز کو بچوں کی حفاظت کے لیے نئی ہدایات بھی جاری کی ہیں۔ ان ہدایات کے تحت بچوں کے پروفائلز کی ڈیفالٹ سیٹنگز 'پرائیویٹ‘ یا 'نجی‘ ہوں گی اور وہ صرف تصدیق شدہ رابطوں والے اکاؤنٹ ہولڈرز کو ہی دکھائی دیں گی۔

اس کے علاوہ آن لائن گیمز میں ایسے فیچرز، جو بچوں کو روزانہ ایپ استعمال کرنے پر مجبور کرتے ہیں، جیسے ''اسٹریکس‘‘ وغیرہ، نابالغ صارفین کے لیے غیر فعال کر دیے جائیں گے۔

یہ اقدامات یورپی یونین کے ڈیجیٹل سروسز ایکٹ (DSA) کے تحت کیے جا رہے ہیں، جو بڑے انٹرنیٹ پلیٹ فارمز پر صارفین کی حفاظت اور سلامتی کے لیے لازمی سخت قواعد کا متقاضی ہے۔ کئی یورپی ممالک سوشل میڈیا تک رسائی کے لیے صارفین کی عمومی عمر کی ایک کم از کم حد مقرر کرنے پر بھی بہت زور دے رہے ہیں۔

شکور رحیم ڈی پی اے کے ساتھ

ادارت: مقبول ملک