یورپی کمیشن میں پہلی مرتبہ مثالی صنفی توازن

یورپی یونین کے رہنماؤں نے جرمنی کی ارزولا فان ڈیئر لائن کو یورپی کمیشن کی سربراہی کے لیے منتخب کیا ہے۔

یورپی کونسل کے سربراہ ڈونلڈ ٹسک نے بتایا ہے کہ یورپی کونسل نے جرمن سیاستدان ارزولا فان ڈیئر لائن کا نام یورپی کمیشن کی سربراہی کے لیے تجویز کیا ۔

فان ڈیئر لائن جرمن چانسلر انگیلا میرکل کی قدامت پسند جماعت سی ڈی یو کی رکن ہیں۔ ان کی تقرری کے لیے 751 رکنی پارلیمان کی اکثریت کی جانب سے منظوری لازمی ہے۔

اس موقع پر ٹسک نے  یورپی یونین کے دیگر اہم عہدوں میں صنفی توازن کا خیر مقدم کیا ہے، '' پہلی اور سب سے اہم بات یہ ہے کہ ہم نے چار اہم عہدوں کے لیے دو خواتین اور دو مردوں کو نامزد کیا ہے۔ یہ مثالی صنفی توازن ہے۔ میں اس حوالے سے بہت خوش ہوں۔‘‘

بیلجیم کے وزیر اعظم چارلس میشل کو یورپی کونسل کے صدر کے لیے نامزد کیا گیا ہے۔ فرانس کی سابق وزیر مالیات اور عالمی مالیاتی فنڈ کی موجودہ ڈائریکٹر کرسٹین لاگارڈ کو یورپی مرکزی بینک کی سربراہ جبکہ ہسپانوی وزیر خارجہ جوزیف بوریل فونٹیلز کو یورپی خارجہ امور کے نگران کے عہدے کے لیے نامزد کیا گیا ہے۔

جرمن چانسلر انگیلا میرکل نے فان ڈیئر لائن کی نامزدگی پر کہا کہ یورپی رہنماؤں نے فان ڈیئر لائن کو مکمل اتفاق کے ساتھ نامزد کیا ہے۔ فرانسیسی صدر ایمانوئل ماکروں کا اس معاہدے پر کہنا تھا کہ یہ فرانکو جرمن گہری دوستی کا ثمر ہے۔

یورپی کمیشن کے موجودہ صدر ژاں کلود یُنکر نے کہا کہ یورپی پارلیمان میں ان نامزدگیوں کی توثیق کا مرحلہ آسان نہیں ہو گا۔