یورپ کے ساتھ تعاون جاری رہے گا، امریکی وزیر خارجہ

اسی دوران روسی وزیر خارجہ نے شام کے بارے میں سکیورٹی کونسل میں پیش کی جانے والی قرارداد پر تحفظات کا اظہار کیا ہے۔ اس مذمتی قرار دار پر سلامتی کونسل میں آج ووٹنگ کی جائے گی۔

امریکی وزیر خارجہ ہلیری کلنٹن نے ہفتے کے دن میونخ سلامتی کانفرنس سے خطاب کرتے ہوئے کہا کہ یورپ کے ساتھ امریکہ کا تعاون تاریخی نوعیت کا ہے اور یہ ہمیشہ جاری رہے گا۔

اڑتالیسویں سالانہ میونخ سلامتی کانفرنس سے خطاب کرتے ہوئے امریکی وزیر دفاع نے بھی کچھ انہی خیالات کا اظہار کیا تاہم انہوں نے زور دیا کہ یورپ کے دفاع کے لیے یورپی ممالک کو بھی سرمایہ کاری کرنا ہو گی۔ انہوں نے کہا کہ اگرچہ امریکی حکومت اپنی نئی عسکری حکمت عملی میں ایشیا پر توجہ مرکوز رکھنے کی کوشش میں ہے تاہم اس کا مقصد یہ نہیں کہ اس کا دھیان یورپ سے ہٹ جائے گا۔

میونخ سکیورٹی کانفرنس کی افتتاحی تقریب سے خطاب میں جرمن وزیر دفاع تھوماس ڈے میزئیر نے یورپ کی بڑھتی ہوئی اسٹریٹیجک اہمیت پر زور دیا اور کہا کہ خطے کو ذمہ داری اٹھانے کے قابل ہونا چاہیے۔

میونخ سکیورٹی کانفرنس میں سیاسی، اقتصادی، عسکری اور غیرسرکاری تنظیموں کے حلقوں سمیت 350 مندوبین شریک ہیں۔ اس کانفرنس میں ایران ، شام اور مشرق وسطیٰ کو بھی نمایاں حیثت حاصل ہے۔

امریکی وزیر خارجہ ہلیری کلنٹن نے کہا کہ شام میں جاری کریک ڈاؤن پر امریکہ اور یورپی ممالک ایک ہی مؤقف رکھتے ہیں۔ انہوں نے کہا کہ مغربی ممالک عرب لیگ کے اس مطالبے سے متفق ہیں کہ صدر بشار الاسد کو اپنی ہی عوام کے خلاف سکیورٹی کریک ڈؤان ختم کرتے ہوئے تمام مسائل کا سیاسی حل تلاش کرنا چاہیے۔

ہلیری کلنٹن نے کہا کہ شام کے بارے میں سلامتی کونسل میں ہونے والی آج کی ملاقات انتہائی اہم ہے اور اس میں وہ شامی بحران کے حوالے سے عالمی ردعمل واضع کرنے میں کامیاب ہو جائے گی۔

دوسری طرف روس نے سلامتی کونسل میں آج ووٹنگ کے لیے پیش کی جانے والی اس قرارداد پر تحفظات کا اظہار کیا ہے، جس میں صدر بشار الاسد کی حکومت کی شدید مذمت کی گئی ہے۔ روسی وزیر خارجہ سرگئی لاوورف نے میونخ سلامتی کانفرنس میں کہا کہ یہ قرار داد موجودہ شکل میں قابل قبول نہیں ہے۔

فرانس اور اقوام متحدہ نے شام میں والے اس تازہ تشدد کی سخت الفاظ میں مذمت کی ہے، جس میں عینی شاہدین کے بقول دو سو سے زائد افراد ہلاک ہو گئے ہیں۔ انسانی حقوق کے سرکردہ کارکنان نے دعویٰ کیا ہے کہ شامی شہر حمص میں سکیورٹی فورسز نے قتل عام کرتے ہوئے ڈھائی سو سے زائد افراد کو ہلاک کر دیا ہے۔ تاہم سرکاری میڈیا نے ایسی تمام خبروں کی تردید کی ہے۔

رپورٹ: عاطف بلوچ

ادارت: امتیاز احمد