یورپ میں تبدیلی وقت کو روکنے کا وقت، دو سال بعد

موجودہ ’ٹائم سسٹم‘ کے مطابق مغربی یورپ میں ہر سال معیاری وقت دو بار تبدیل ہوتا ہے۔ ایک بار مارچ کے اواخر میں جب موسم گرما کا معیاری وقت شروع ہوتا ہے اور تمام گھڑیاں ایک گھنٹہ آگے کر دی جاتی ہیں اور دوسری بار اکتوبر کے اواخر میں جب موسم سرما کے معیاری وقت کے آغاز پر تمام گھڑیاں دوبارہ ایک گھنٹہ پیچھے کر دی جاتی ہیں۔

معیاری وقت میں تبدیلی کے نظام کا مقصد گرمیوں میں توانائی کے ذرائع کو بہتر طور پر استعمال کرنا اور سورج کی روشنی سے زیادہ سے زیادہ فائدہ اٹھانا تھا۔ لیکن اب یہ نظام ختم کر دیا جائے گا۔ اس کا مقصد یورپ بھر میں ’کوآرڈینیشن میکنزم‘ کو بہتر بنانا یا یورپی ممالک میں ’ہم آہنگی‘ پیدا کرنا بتایا گیا ہے۔

تاہم یورپی پارلیمان کی طرف سے کیا گیا یہ فیصلہ ایک عارضی فیصلہ ہے۔ یورپی یونین کے وزرائے ٹرانسپورٹ ابھی تک اس حوالے سے اتفاق رائے پیدا نہیں کر پائے۔ لیکن آج کے اس فیصلے کے بعد یورپی یونین کے تمام ممالک میں اتفاق رائے پیدا کرنے کے لیے عملی کوششوں کا باقاعدہ آغاز ہو جائے گا۔

قبل ازیں گزشتہ برس فروری میں یورپی پارلیمان نے یورپی کمیشن سے کہا تھا کہ وہ اس بات کا جائزہ لے کہ اس نظام پر عمل درآمد جاری رکھنے کے فوائد کیا ہیں اور اس میں ممکنہ تبدیلی کے کیا  اثرات ہو سکتے ہیں؟

یورپی یونین میں آج کل تین ’ٹائم زون‘ ہیں۔ جرمنی اور مزید سولہ یورپی ممالک کا وقت یکساں ہے۔ بلغاریہ، ایسٹونیا، فن لینڈ، یونان اور قبرص سمیت آٹھ ممالک مغربی یورپ سے ایک گھنٹہ آگے ہیں جبکہ آئرلینڈ، پرتگال اور برطانیہ ایک گھنٹہ پیچھے ہیں۔

تاہم اب کئی ممالک چاہتے ہیں کہ موسم سرما میں گھڑیاں ایک گھنٹہ آگے نہ کی جائیں۔ سال بھر موسم گرما کے معیاری وقت کی حمایت کرنے والے ممالک میں بَینے لُکس ریاستیں (بیلجیم، ہالینڈ اور لکسمبرگ)، آسٹریا اور جرمنی شامل ہیں جبکہ سلوواکیہ موسم سرما کا وقت اور پرتگال وقت کی تبدیلی کے موجودہ نظام پر عمل پیرا رہنا چاہتا ہے۔

ا ا / ع ا