یوروفٹ بال چیمپئن شپ، انگلینڈ اور فرانس بھی ’سپر ایٹ‘ میں

سویڈن سے دو صفر سے مات کھانے کے بعد فرانس نے اپنے گروپ میں پہلا نمبر گنوا دیا ہے۔ اس لیے اب وہ سپر ایٹ مرحلے میں عالمی چیمپئن اور اس ٹورنامنٹ کی فیورٹ تصور کی جا رہی ٹیم اسپین کے مد مقابل آئے گا جبکہ انگلینڈ نے ایک دلچسپ میچ میں یوکرائن کو ہرانے کے بعد گروپ لیڈر ہونے کا اعزاز حاصل کر لیا ہے۔ انگلش ٹیم کوارٹر فائنل میں اٹلی کے ساتھ اتوار کو نبرد آزما ہو گی۔

منگل کی شب یوکرائن اور انگلینڈ کے مابین ڈونیتسک میں کھیلے گئے اس میچ میں میزبان ٹیم نے انتہائی عمدہ کھیل کا مظاہرہ کیا۔ تاہم میچ کے اڑتالیسویں منٹ میں مانچسٹر یونائیٹڈ کے اسٹرائیکر وین رونی نے انگلش ٹیم کو فیصلہ کن برتری دلوا دی۔

کھیل کے 62 ویں منٹ میں یوکرائن کے کھلاڑی مارکو ڈیوَچ نے انتہائی عمدگی کے ساتھ گول کیپر کو جھانسہ دے کر فٹ بال کو گول پوسٹ میں ڈالا لیکن انگلش اسٹار دفاعی کھلاڑی جان ٹیری نے اسے انتہائی کمال سے روک دیا۔ بظاہر معلوم ہوا کہ یوکرائن نے گول کر دیا ہے تاہم ریفری نے اسے گول قرار نہ دیا۔ ناقدین کے بقول اس متنازعہ فیصلے کے بعد اب یوئیفا کے صدر میشئل پلاٹینی پر دباؤ بڑھ جائے گا کہ وہ گول لائن ٹیکنالوجی کی مخالفت ختم کر دیں۔

میچ کے بعد یوکرائن کے کوچ اولیگ بلاخن نے کہا، ’’ میں بہت اداس ہوں کیونکہ اس وقت فٹ بال گول پوسٹ کے ایک میٹر اندر جا چکا تھا‘‘۔

منگل کو کییف میں کھیلے گئے گروپ ڈی کے ایک اور میچ میں سویڈن نے فرانس کو شکست دی لیکن فرانس نے اس کے باوجود سپر ایٹ مرحلے کے لیے کوالیفائی کر لیا ہے۔ اس میچ میں سویڈن کے کپتان ابراہمووچ نے 54 ویں منٹ میں انتہائی دلکش گول کیا۔ جس کے بعد فرانس کی ٹیم اس برتری کو ختم کرنے میں ناکام رہی۔ کھیل کے آخری مرحلے میں لارسن نے اس برتری کو دوگنا کر دیا۔

اب واضح ہو گیا ہے کہ کوارٹر فائنل مقابلوں میں کون سی ٹیم کس کے مد مقابل ہو گی۔ کوارٹر فائنل مرحلہ اکیس جون کو شروع ہو گا اور پہلا میچ پرتگال اور چیک جمہوریہ کے مابین کھیلا جائے گا۔ ناک آؤٹ مرحلے کا دوسرا میچ بائیس جون کو جرمنی اور یونان کے مابین ہوگا۔ تئیس جون کو فرانس اور دفاعی چیمپئن اسپین مد مقابل ہوں گے جبکہ اس مرحلے کا آخری میچ چوبیس جون کو اٹلی اور انگلینڈ کے مابین کھیلا جائے گا۔

(ab/ai (AP)