یورو کپ کا بائیکاٹ نہ کیا جائے، پولش صدر

یوکرائن اور پولینڈ مشترکہ طور پر یورو کپ 2012ء کی میزبانی کر رہے ہیں۔ یوکرائن میں سابق وزیراعظم یولیا ٹیموشینکو کی سزا اور ان کے ساتھ روا رکھے جانے والے سلوک کی وجہ سے کئی مغربی ممالک کی ایف حکومت کو مسلسل تنقید کا نشانہ بنا رہے ہیں۔ ساتھ ہی ان ممالک نے اس فٹ بال ٹورنامنٹ کے بائیکاٹ کی دھمکی بھی دی ہے۔ پولینڈ کے صدربرونیسلاوکومورفسکی بقول اگر ان مقابلوں کا بائیکاٹ کیا جاتا ہے تو اس طرح سابقہ سوویت یونین کی یہ ریاست دوبارہ روس کے ہاتھوں میں جا سکتی ہے۔ انہوں نے کہا کہ جیل میں ٹیموشینکو کے ساتھ سلوک کی وجہ سے یورو کپ میں شرکت نہ کرنے کا فیصلہ نامناسب ہے۔ جرمن چانسلر انگیلا میرکل کےعلاوہ یورپی یونین کےکئی ملکوں نے دوران حراست یولیا ٹیموشینکو پر مبینہ تشدد کے خلاف احتجاج کرتے ہوئے اس ٹورنامنٹ میں کسی طرح بھی شامل نہ ہونے اور پہلے سے طے شدہ پروگرام کو منسوخ کرنے کی دھمکی دی ہے۔

پولینڈ کے صدر نے کہا، ’یوکرائن کے موجودہ حالات کے تناظر میں بائیکاٹ کا فیصلہ غیر دانشمندانہ ہے‘۔ انہوں نے کہا کہ تاریخ میں صرف دو مرتبہ اولمپک کھیلوں کا بائیکاٹ کیا گیا ہے۔ سابقہ سویت یونین کے افغانستان پر حملے کی وجہ سے 1980ء کے ماسکو اولمکپس اور چین کی جانب سے تبت میں آزادی کی تحریک کچلنے کی وجہ سے متعدد ممالک کے سربراہان نے 2008ء میں بیجنگ اولمپکس کی متعدد تقریبات کا بائیکاٹ کیا تھا۔ ’’ تاہم یوکرائن کی صورتحال بالکل مختلف ہے‘‘۔

یوکرائن کی سابق وزیراعظم یولیا ٹیموشینکو کو اختیارات کے ناجائز استعمال کی وجہ سے سات سال کی سزا سنائی گئی ہے۔ تاہم دوران حراست ان پر مبینہ تشدد کیا گیا، جس کے خلاف انہوں نے 20 اپریل سے بھوک ہڑتال بھی کی۔ وہ اپنی سزا کو سیاسی چال قرار دیتی ہیں۔ ان حالات میں یوکرائن کی حکومت پر دباؤ میں اضافہ ہوتا جا رہا ہے۔

جرمن چانسلر میرکل نے کہا ہے کہ وہ یوکرائن جانے یا نہ جانے کا فیصلہ آخری اوقات میں کریں گی۔ اس حوالےسے جرمن ذرائغ ابلاغ کے مطابق چانسلر میرکل اپنے وزارء کو بھی اس ٹورنامنٹ سے دور رہنے کے لیے احکامات دینے والی ہیں۔ آسٹریا کی حکومت نے بھی یوکرائن میں تمام میچز کے بائیکاٹ کا فیصلہ کیا ہے جبکہ یورپی کمیشن کے سربراہ ژوزے مانوئیل باروسو نے بھی کہا ہے کہ ان کا یوکرائن جانے کی فی الحال کوئی ارادہ نہیں ہے۔

یورپی فٹ بال چیمپئن شپ اگلے ماہ سے پولینڈ اور یوکرائن کی مشترکہ میزبانی میں شروع ہو رہی ہے۔

ai/at (AFP)