یورو کپ: فرانس اور انگلینڈ کا میچ برابر، یوکرائن فاتح

یورو کپ 2012ء کے چوتھے روز پہلا میچ فرانس اور انگلینڈ کے درمیان میزبان یوکرائن کے شہر Donetsk کے ڈونباس ایرینا میں کھیلا گیا۔ اس میچ کا پہلا گول انگلینڈ کے ہیڈر جولین لیسکوٹ نے کیا اور بعدازاں مانچسٹر سٹی کے لیے ان کے ساتھی سمیر نصری نے میچ برابر کر دیا۔

انگلش منیجر Roy Hodgson کا کہنا تھا: ’’ہم ایک مشکل ٹیم کے خلاف کھیل رہے تھے اور میرا خیال ہے کہ ہم نے اچھا کھیل پیش کیا۔‘‘

ان کا مزید کہنا تھا کہ ان کی ٹیم بہت منظم تھی۔ فرانسیسی کوچ لوراں بانک نے کہا: ’’ہم پوری طرح خوش تو نہیں ہیں لیکن ہم پوری طرح مایوس بھی نہیں ہے۔‘‘

بانک نے مزید کہا: ’’اگر ہم ردعمل نہ دکھاتے (انگلینڈ کے گول کے بعد) تو ہم یہ میچ ہار سکتے تھے، تو یہ مثبت باتوں میں سے ایک رہی۔ لیکن میں سجھتا ہوں کہ آپ اس مقابلے پر غور کریں تو آپ دیکھیں گے کہ سب سے زیادہ فٹ بال فرانس نے کھیلا۔‘‘

اس نتیجے کے ساتھ دونوں ٹیمیں ہی پوائنٹس لے کر میدان سے نکلیں۔ اب اس گروپ میں انگلینڈ جمعے کو سویڈن کا سامنا کرے گا جبکہ فرانس اسی روز یواکرئن کے خلاف اپنا دوسرا میچ کھیلے گا۔

سویڈن بمقابلہ یوکرائن:

پیر کو گروپ ڈی کا دوسرا میچ کیف میں شریک میزبان یوکرائن اور سویڈن کے درمیان ہوا۔ اس میں دو ایک سے یواکرائن کی فتح حیرت زدہ کر دینے والی تھی۔ پہلے ہاف کے دوران خاصا تناؤ رہا۔

خبر رساں ادارے روئٹرز کے مطابق یوکرائن کے کھلاڑیوں نے پہلے ہاف میں زبردست کھیل پیش کیا اور ان کے سامنے سویڈین وہ ٹیم دکھائی نہیں دی جس نے یورو کپ کے کوالیفکیشن مرحلے میں اکتیس گول اسکور کیے تھے۔

وقفے کے سات منٹ بعد سویڈن کے زلاتان ابراهيموچ نے گول کر کے اپنی ٹیم کو سبقت دلا دی۔ اس کے تین منٹ بعد ہی یوکرائن کے اندريہ شيفشينكو نے گول کر کے میچ برابر کر دیا جبکہ بعدازاں انہوں نے ہی مزید ایک گول کر اپنی ٹیم کی پوزیشن مضبوط بنائی جبکہ سویڈن کے کھلاڑی مزید گول نہ کر سکے۔

یوکرائن کی اس جیت کے بعد دارالحکومت کیف میں ایک جشن کا سا سماں دکھائی دیا۔ اولمپک اسٹیڈیم کے اطراف بھی لوگ خوشی سے کاروں کے ہارن بجاتے رہے۔

آج گروپ اے کے میچ شریک میزبان پولینڈ میں ہوں گے۔ پہلا میچ یونان اور چیک جمہوریہ کے درمیان ہو گا جبکہ دوسرا میچ پولینڈ اور روس کے درمیان ہو گا۔

ng/at (AFP, Reuters)