یورو کپ، رونالڈو کا جادو چل گیا

یورپی فٹ بال چیمپیئن شپ کے اس کوارٹر فائنل مقابلے میں 79 منٹ تک کوئی بھی ٹیم گول نہیں کر پائی تھی۔ پولینڈ کے دارالحکومت وارسا میں کھیلے گئے اس میچ کا واحد گول رونالڈو ہی نے کیا۔ وہ اس سے قبل دو بار گول کرنے کے بہت قریب پہنچ چکے تھے مگر ان کی ہٹس گول پوسٹس سے ٹکرا گئیں۔ میچ کے بعد رونالڈو کا کہنا تھا کہ اس سے قبل گزشتہ میچ میں بھی انہوں نے دو بار گول پوسٹس کو ہٹ کیا مگر گول نہیں کر پائے تھے: ’’سب سے اہم بات یہ ہے کہ میں اس بار گول کرنے میں کامیاب ہو گیا، ہم جیت گئے اور سیمی فائنل میں پہنچ گئے اور اب مسکراہٹوں اور اچھی موسیقی کا وقت ہے۔‘‘

پرتگال کی ٹیم اب آئندہ بدھ کو کھیلے جانے والے سیمی فائنل میں فرانس یا اسپین میں سے کسی ایک کا سامنا کرے گی۔ فرانس اور اسپین کے درمیان کوارٹر فائنل ہفتے کو کھیلا جائے گا۔ فائنل تک رسائی کی صورت میں یہ جنوبی یورپی ملک یعنی پرتگال گزشتہ آٹھ برسوں میں دوسری بار یوئیفا کپ کے فائنل میں شرکت کا اعزاز پا لے گا۔ پرتگال کی ٹیم 2004ء کے فائنل میچ میں یونان سے ہار گئی تھی۔

گزشتہ روز کے مقابلے میں چیک جمہوریہ کی ٹیم خاصے دفاعی انداز میں دکھائی دی۔ پرتگال کی جانب سے ان کے گول پر قریب 20 حملے ہوئے، جن کے جواب میں چیک جمہوریہ کے کھلاڑیوں نے محض دو ناکام حملے کیے۔ دوسرے ہاف کے آخری چند منٹوں تک ان کی یہ دفاعی حکمت عملی کامیاب ہوتی دکھائی دے رہی تھی اور پرتگال کو گول کرنے میں خاصی پریشانی کا سامنا تھا۔ چیک جمہوریہ کے کوچ میخائیل بیلیک نے مقابلے کے بعد کہا، ’’دوسرے ہاف میں ہمارے کھلاڑیوں کی ہمت اور حوصلہ جواب دے گئے اور پرتگال کو ایک موقع ملا، جس نے میچ کا فیصلہ کر ڈالا۔‘‘

فتح کے بعد پرتگال کے کھلاڑیوں کی خوشی دیدنی تھی۔ ان کے سٹار سٹرائیکر رونالڈو نے مسلسل دوسری بار انہیں اہم موقع پر جیت دلوائی۔ گزشتہ دو مقابلوں سے قبل وہ لیگ میچز میں نمایاں کارکردگی نہیں دکھا پائے تھے۔ یورو کپ کے کوارٹر فائنل مقابلوں کا دوسرا میچ آج جرمنی اور یونان کے درمیان ہوگا۔

(sks/aa (AP