ہنگری کی خراب مالی حالت اور يورپی يونين سے تنازعہ

ہنگری کے وزير اعظم کو انتہائی مشکل صورتحال کا سامنا ہے۔ ليکن اس کے باوجود وہ يورپی کميشن سے مصالحت پر صحيح طرح آمادہ نظر نہيں آتے۔ انہوں نے کہا: ’’بنيادی موضوع مرکزی بينک کا قانون ہی ہے۔ يورپی يونين نے اپنے قانونی دلائل ديے ہيں اور صرف اپنا سياسی موقف ہی پيش نہيں کيا ہے۔ مجھے يہ دلائل تسليم نہ کرنے کی کوئی وجہ نظر نہيں آتی۔ ليکن اُس کے ايسے دلائل بھی ہيں جو ہمارے نظريات سے بہت مختلف ہيں۔‘‘

يورپی کميشن جن دوسری باتوں پر تنقيد کر رہا ہے، اُن پر گفتگو کے ليے اوربان پہلے ہی سے بہت کم آمادہ ہيں۔ ان ميں سے ايک عدالتی شعبے ميں اصلاحات ہيں۔ پہلے تو ججوں کی ريٹائرمنٹ کی عمر کم کی جائے گی ليکن دو سال بعد ہی اس ميں پھر اضافہ کر ديا جائے گا۔ يورپی يونين يہ سمجھتی ہے کہ اس کا مقصد صرف ناپسنديدہ ججوں سے چھٹکارا حاصل کرنا ہے۔

ہنگری کے وزير اعظم نے کہا: ’’ججوں کے معاملے ميں يورپی يونين کو کوئی اختيار حاصل نہيں ہے۔ يہ ہنگری کا اپنا معاملہ ہے۔ ريٹائرمنٹ کی عمر ايک نزاعی مسئلہ معلوم ہوتی ہے۔ ليکن يہ يورپی يونين ہی ہے جو ريٹائرمنٹ کے شفاف اور صاف ضوابط کا مطالبہ کرتی ہے اور يہ ہنگری ميں موجود ہيں۔‘‘

ہنگری اور يورپی کميشن کے درميان تنازعہ جاری رہنے کی صورت ميں نوبت معاہدے کی خلاف ورزی پر ہنگری کے خلاف کارروائی تک آ سکتی ہے اور اس کے نتيجے ميں يورپی يونين کے کمزور علاقوں کی امداد کے فنڈ سے ہنگری کو ملنے والی مدد رک سکتی ہے، جس کی ہنگری کو سخت ضرورت ہے۔ اس کے علاوہ يورپی يونين اور بين الاقوامی مالياتی فنڈ کے ايک اربوں ڈالر کے مشترکہ امدادی پروگرام پر بات چيت صحيح طور پر شروع ہونے سے پہلے ہی رک سکتی ہے۔ اس طرح زيادہ سے زيادہ موسم بہار تک ہنگری کے نا دہندہ ہو جانے کا امکان ہے۔

تو پھر وزير اعظم وکٹر اوربان کيوں سخت رويہ اختيار کيے ہوئے ہيں؟ ممکن ہے کہ وہ يہ سمجھ رہے ہوں کہ قانونی جانچ پرکھ کے بعد يورپی يونين کی مطلوبہ ترميمات بہت کم رہ جائيں گی اور اس طرح وہ ايک کاغذی شير کی طرح ہوجائے گی، جبکہ خود اوربان کی حيثيت اپنے حاميوں کی نظر ميں کہيں زيادہ بڑھ جائے گی۔ ليکن اس کھيل کے نتيجے ميں حکومت عالمی اعتماد سے اور زيادہ محروم ہو جائے گی اور ملک کے اندربھی اب بہت سے ووٹروں نے بر سر اقتدار پارٹی سے منہ پھير ليا ہے۔

رپورٹ: يورگن پاس، وی آنا / شہاب احمد صديقی

ادارت: عدنان اسحاق