ہالینڈ کے وزیر خزانہ یورو گروپ کے سربراہ منتخب

46 سالہ ییرون ڈائسل بلوم Dijsselbloem نے یوروزن کے یورو گروپ کی سربراہی کا منصب لکسمبرگ کے وزیر اعظم یاں کلود یُنکر کی جگہ سنبھالا ہے جو 2005ء سے اس عہدے پر فائز تھے اور یورو زون کو درپیش قرضوں کے بحران سے نمٹنے میں کلیدی کردار ادا کرتے رہے۔

ڈائسل بلوم یوروگروپ کی سربراہی کے واحد امیدوار تھے لیکن اس کے باوجود یورو گروپ کے سربراہ کے منصب کے طور پر منظوری سے قبل پہلے انہیں یوروزون کےلیے آئندہ اقتصادی ایجنڈے کے خدوخال واضح کرنے کا کہا گیا تھا۔ اس عہدے کی مدت ڈھائی سال ہے۔

یورو گروپ کا سربراہ منتخب ہونے کے بعد ڈائسل بلوم نے صحافیوں سے گفتگو کرتے ہوئے کہا کہ یوروزون اپنا کھویا ہوا اعتماد دوبارہ حاصل کر رہا ہے تاہم معاشی بہتری اور روزگار کے مواقع پیدا کرنے کےلیے ابھی بہت کچھ کرنا باقی ہے۔ ان کا مزید کہنا تھا کہ موجودہ اقتصادی رفتار کو برقرار رکھنے اور اس پر مزید کام کرنے کی ضرورت ہے اور ہمیں اپنے فیصلوں کا بھی پھر سے جائزہ لینا ہو گا۔ انہوں نے بینکنگ یونین، معاشی استحکام اور مسابقت کا حوالہ دیتے ہوئے کہا کہ یہ اہم امور ہیں جن پر مزید کام کرنے کی ضرورت ہو گی۔

لکسمبرگ کے وزیراعظم یاں کلود یُنکر کا کہنا ہے کہ اسپین نے ڈائسل بلوم کی حمایت نہیں کی لیکن وہ نہیں سمجھتے کہ اس کے کسی قسم کے ڈرامائی نتائج ہوں گے۔

ماہرین کا کہنا ہے کہ یورو زون میں شامل نسبتاﹰ کمزور معاشی ممالک کو ڈر ہے کہ مستحکم اقتصادی درجہ بندی ٹرپل اے AAA میں شامل ملک سے تعلق رکھنے والے ڈائسل بلوم یکجہتی کی پالیسی سے زیادہ کمزور معاشی ملکوں سے حکومتی اخراجات میں کمی پر زیادہ زور دیں گے۔ تاہم یوروگروپ کے نومنتخب سربراہ کا کہنا تھا کہ یوروزون میں جہاں ایک طرف معاشی درجہ بندی کے لحاظ سے بہت طاقتور ممالک ہیں تو دوسری طرف معاشی درجہ بندی میں بہت کمزور ممالک بھی ہیں۔ تاہم ان کا کہنا تھا: ’’اگر ہم اس درجہ بندی سے بالا تر ہو کر سوچیں تو کوئی وجہ نہیں کہ ہم آگے نہ بڑھ سکیں۔ ‘‘ ڈائسل بلوم کے مطابق ایک سوشل ڈیموکریٹ سیاستدان کے طور پر وہ یکجہتی پر یقین رکھتے ہیں۔

پیر 21 جنوری کو یورو زون کے تمام 17 رکن ممالک کے وزرائے خزانہ کے اجلاس میں مشترکہ کرنسی یورو کو مزید مؤثر بنانے کےلیے اہم معاشی فیصلوں پر بھی بات چیت کی گئی۔ یوروزون میں قرضوں کے بحران کے دوران سارا زور اس بات پر ہے کہ کس طرح رکن ممالک کو اس مشکل سے نکالا جائے۔

rh/aa(dpa)