گائے کے گلے میں گھنٹی ہو، تو وہ بجے گی بھی

جنوبی جرمنی کے ایلپس کے پہاڑی سلسلے سے متصل صوبے باویریا کے دارالحکومت میونخ سے جمعرات گیارہ اپریل کو ملنے والی نیوز ایجنسی ڈی پی اے کی رپورٹوں کے مطابق یہ فیصلہ سناتے ہوئے باویریا کی ایک اعلیٰ صوبائی عدالت نے ہولس کرشن (Holzkirchen) نامی علاقے کے ایک گاؤں کے ایک جوڑے کی طرف سے دائرہ کردہ مقدمہ خارج کر دیا۔ اس سے قبل ایک ماتحت عدالت نے بھی یہی مقدمہ خارج کر دیا تھا۔

یہ مقدمہ ایک شادی شدہ دیہی جوڑے کی ایک ایسی مقامی خاتون کسان کے خلاف دائر کردہ قانونی شکایت تھی، جس کے مویشیوں کی بہت وسیع چراگاہ درخواست دہندگان کی رہائش گاہ  کے ہمسائے میں تھی۔

مقدمے میں شکایت کی گئی تھی کہ چراگاہ میں چرنے والی اور قریب سے گزرنے والی گائیوں کے گلے میں بندھی گھنٹیوں کا شور کئی برسوں سے اس جوڑے کے لیے نہ صرف عذاب بنا ہوا ہے بلکہ یوں ’شور کی وجہ سے پیدا ہونے والی آلودگی‘ اس کی حق تلفی کا سبب بھی بن رہی ہے۔

مقدمے کی بازگشت صوبائی پارلیمان تک میں

اس باویرین جوڑے نے عدالت سے درخواست کی تھی کہ اس کی ہمسائی کو حکم دیا جائے کہ وہ اپنی گائیوں کے گلے سے بندھی گھنٹیاں اتار دے، یا ان کا شور انتہائی کم ہونا چاہیے، تاکہ درخواست دہندگان کی حق تلفی نہ ہو۔ یہ مقدمہ باویریا میں اتنا مشہور ہو گیا تھا کہ اس کی بازگشت صوبائی سیاست تک میں بھی سنی جانے لگی تھی۔

عدالت نے اب اپنے فیصلے میں کہا ہے کہ باویریا کی مخصوص ثقافت اور دیہی زندگی کی روایات کو سامنے رکھا جائے تو فطرت کے بہت قریب رہتے ہوئے انسانوں کو اتنی برداشت کا مظاہرہ تو کرنا ہی چاہیے کہ وہ مویشیوں کے گلے کی گھنٹیوں سے پیدا ہونے والے شور کو برداشت کر سکیں۔

ساتھ ہی یہ بھی کہا گیا کہ گائے کے گلے کی گھنٹی کا بجنا انسانوں کی حق تلفی ہو سکتی ہے، یہ بہت دور کی کوڑی ہے اور پھر گائے کے گلے میں اگر گھنٹی ہو گی، تو وہ لازمی طور پر بجے گی بھی۔

گائے اور گھنٹی کو علیحدہ نہیں کیا جا سکتا

اس بارے میں باویریا کی صوبائی پارلیمان کی خاتون اسپیکر اِلزے آئگنر نے، جن کے انتخابی حلقے میں ہولس کرشن کا علاقہ اور اس کے ووٹر بھی شامل ہیں، کہاَ ’’یہ مقدمہ صرف گائے کی گھنٹیوں کے شور کے بارے میں ہی نہیں تھا۔ اس کا تعلق فطرت کے حسن کے بہت قریب رہتے ہوئے ان انسانوں  اور ان کی باہمی برداشت سے بھی تھا، جن میں سے ایک وہاں کئی نسلوں سے رہنے والی ایک خاتون کسان ہے اور دوسرا فریق ایک ایسا شادی شدہ جوڑا، جو بہت بعد میں وہاں رہائش کے لیے منتقل ہوا تھا۔‘‘

اِلزے آئگنر کے مطابق، ’’ہمارے ہاں کے دیہی علاقوں میں گائیں اور چراگاہیں عمومی طرز زندگی کا لازمی حصہ ہیں، جس میں گائے اور اس کے گلے سے بندھی گھنٹی کو ایک دوسرے سے علیحدہ نہیں کیا جا سکتا۔‘‘

درخواست دہندگان کے وکیل نے اعلان کیا ہے کہ وہ صوبائی سطح پر یہ مقدمہ دوسری بار بھی ہار جانے کے بعد اپنے لیے انصاف کی تلاش میں اب جرمنی کی وفاقی عدالت سے رجوع کریں گے۔

م م / ع ح / ڈی پی اے