کورین گراں پری بھی فیٹل کے نام

26 سالہ جرمن ڈرائیور سباستیان فیٹل نے آج بروز اتوار Yeongam کے سرکٹ پر ایک مرتبہ پھر اپنی مہارت دکھاتے ہوئے تمام ڈرائیورز کو پیچھے چھوڑ دیا۔ انہوں نے مسلسل تیسری مرتبہ کورین گراں پری جیتنے کا اعزاز بھی حاصل کر لیا ہے۔ رواں سیزن کی اب تک ہونے والی مجموعی 14 ریسوں میں سے آٹھ مرتبہ انہوں نے ہی کامیابی حاصل کی ہے۔

اس وقت فیٹل کو اپنے قریب ترین حریف ہسپانوی ڈرائیور فرنانڈو الانسو پر 77 پوائنٹس کی برتری حاصل ہو چکی ہے۔ رواں سیزن کے دوران چودہ گراں پری مقابلوں کے بعد فیٹل کے مجموعی پوائنٹس 272 ہیں جب کہ الانسو ابھی تک 195 پوائنٹس حاصل کرنے میں کامیاب ہو سکیں ہیں۔

اگرچہ ابھی اس سیزن کی پانچ ریسیں باقی ہیں تاہم اگر فیٹل آئندہ ہفتے جاپان میں ہونے والی گراں پری بھی جیت جاتے ہیں اور فراری ٹیم کے ڈرائیور الانسو پہلی آٹھ پوزیشنز میں سے کوئی ایک حاصل کرنے میں ناکام ہو جاتے ہیں تو اس برس بھی فارمولا ون کا ٹائٹل فیٹل کے نام کنفرم ہو جائے گا۔

کورین گراں پری میں دوسرے نمبر پر فن لینڈ سے تعلق رکھنے والے لوٹس ٹیم کے ڈارئیور کیمی رائکونین رہے اور تیسرے نمبر پر لوٹس کے ہی فرانسیسی ڈرائیور Romain Grosjean رہے۔ رائکونین اس ریس میں فیٹل سے 4.2 سکینڈ پیچھے رہے جب کہ Romain کیمی رائکونین سے صرف نصف سکینڈ۔

کورین گراں پری کے بعد میڈیا سے گفتگو کرتے ہوئے سباستیان فیٹل نے کہا کہ وہ اس کامیابی پر انتہائی مطمئن ہیں، ’’میں ان نتائج سے خوش ہوں اور اپنی ٹیم کا شکر گزار ہوں۔‘‘ انہوں نے لوٹس ٹیم کے ڈرائیورز کی تعریف بھی کی۔ فیٹل نے کہا کہ کیمی اور Romain دونوں نے ہی عمدہ کارکردگی کا مظاہرہ کیا، ’’ اس میں کوئی شک نہیں کہ کیمی اور Romain کی کاروں کے ٹائر بہت بہتر تھے لیکن خوش قسمتی سے میرے پاس وقت تھا کہ میں آگے نکل سکوں۔‘‘