کانگو کے تھوماس لوبانگا کو 14 سال کی سزا

خبر رساں ادارے اے پی کی ايک رپورٹ کے مطابق انٹرنيشنل کرمنل کورٹ کے جج ايڈرين فلفورڈ نے اس کيس کے حوالے سے اپنا فيصلہ سناتے ہوئے کہا، ’تمام حقائق کو مد نظر رکھتے ہوئے يہ عدالت تھوماس لوبانگا کو 14 سال قيد کی سزا سناتی ہے‘۔ انہوں نے مزيد کہا کہ عدالت نے اپنا فيصلہ سناتے وقت اس بات کا بھی خيال رکھا ہے کہ لوبانگا 2006ء سے ہيگ کی جیل ميں زير حراست ہيں۔ اب انہيں 14 سال کی مجموعی قيد کے باقی آٹھ سال ہی سلاخوں کے پيچھے گزارنے ہيں۔

اکاون سالہ تھوماس لوبانگا پر يہ الزام تھا کہ انہوں نے 2002ء اور 2003ء کے دوران ڈيموکريٹک ريپبلک آف کانگو ميں اپنی باغی فوج ميں بچوں کو سپاہيوں کے طور پر استعمال کيا تھا۔ انہوں نے کانگو کے شمال مشرقی علاقوں ميں ان بچوں کو جنگی کارروائيوں ميں حصہ لينے پر مجبور کيا تھا۔ ان جرائم ميں لوبانگا کو جنگی جرائم کی عدالت کی جانب سے رواں سال مارچ ميں مجرم قرار دے ديا گيا تھا ليکن انہيں باقائدہ سزا اب سنائی گئی ہے۔

اے پی کے مطابق تھوماس لوبانگا نے اپنی فوج ميں گيارہ سال کی عمر کے بچے بھی شامل کر رکھے تھے۔ ان پر ايک اور الزام يہ تھا کہ وہ اپنی فوج ميں کم عمر لڑکيوں کو بھی جبری طور پر بھرتی کیا کرتے تھے اور پھر ان کم سن لڑکیوں کو جنسی تشدد کا نشانہ بنایا جاتا تھا۔ جبکہ لڑکوں کو جنگی تربيت دی جاتی تھی۔ البتہ انٹرنيشنل کرمنل کورٹ کے جج ايڈرين فلفورڈ کے مطابق جنسی تشدد سے متعلق الزامات کے ٹھوس شواہد نہ ملنے کی وجہ سے يہ الزام ثابت نہ ہو سکا۔

اس کيس کے بارے ميں انٹرنيشنل کرمنل کورٹ کے چيف پراسيکيوٹر Luis Moreno-Ocampo نے گزشتہ ماہ يہ مطالبہ کيا تھا کہ لوبانگا کو تيس سال قيد کی سزا سنائی جائے۔

واضح رہے کہ انٹرنيشنل کرمنل کورٹ ميں تھوماس لوبانگا پر يہ کيس سن 2009 سے جاری تھا۔ لوبانگا يونين آف کانگوليز پيٹريٹس کے بانی تھے اور ’پيٹري آٹک فورسز فار دی ليبريشن آف کانگو‘ کی افواج کے کمانڈر بھی تھے۔

as / km / AP