کاتالونيا ميں ريفرنڈم، 80 فیصد ووٹ آزادی کے حق ميں

کاتالونيا ميں اتوار نو نومبر کے روز کرائے جانے والے ريفرنڈم کے ابتدائی نتائج اتوار اور پير کی درميانی شب جاری کيے گئے، جن کے مطابق 2.25 ملين افراد نے رائے شماری ميں حصہ ليا اور ان ميں سے قريب 80.1 فيصد نے اسپين سے مکمل آزادی کی حمايت ميں ووٹ ڈالے۔ 10.1فيصد لوگوں نے اسپين سے منسلک رہنے ليکن ايک خود مختار رياست کے قيام کے حق ميں فيصلہ کيا جبکہ صرف 4.6 فيصد لوگوں نے کسی بھی صورت ميں آزادی کی مخالفت کی۔ ريفرنڈم کے باقاعدہ نتائج کا اعلان آج پير کے روز کسی وقت متوقع ہے۔

ہسپانوی حکومت نے اس ريفرنڈم کے ليے ’ورتھ ليس‘ کا لفظ استعمال کيا ہے، جس کا لغوی مطلب ’بيکار‘ ہے۔

اگرچہ حاليہ عدالتی فيصلوں کے روشنی ميں اس ريفرنڈم کو رائے عامہ کے جائزوں کے طور پر ليا جا سکتا ہے تاہم يہ بات ابھی تک واضح نہيں کہ اس ريفرنڈم کی اہميت در اصل کيا ہے ؟ ميڈرڈ حکومت کا موقف رہا ہے کہ صرف ملکی حکومت ہی کو يہ اختيار حاصل ہے کہ وہ اس قسم کے ريفرنڈم کا انعقاد کرائے۔ اس بارے ميں ميڈرڈ حکومت کی طرف سے دائر کی جانے والی ايک اپيل پر اسپين کی آئينی عدالت نے پچھلے ہفتے ہی ريفرنڈم کی منسوخی کا حکم دے ديا تھا۔ اس کے باوجود کاتالونيا کے رہنماؤں نے ريفرنڈم کروانے کا فيصلہ کيا۔

کاتالونيا کی حکومت کے سربراہ آرٹور ماس نے اپيل کی ہے دنيا اسپن کو کاتالونيا کی آزادی کے حوالے سے ريفرنڈم کے انعقاد پر قائل کرے۔ بارسلونا ميں انہوں نے اخباری نمائندوں سے بات چيت کرتے ہوئے کہا کہ قانونی طور پر اور ايک ايسے ريفرنڈم کا انعقاد کہ جس پر عمل در آمد لازمی ہو، ان کا حق ہے اور وہ اس کے ليے کوششيں جاری رکھيں گے۔

واضح رہے کہ کاتالونيا کے خطے ميں گزشتہ روز اس محض علامتی ريفرنڈم کے انعقاد کو پائے تکميل تک پہنچانے کے ليے قريب چاليس ہزار رضاکاروں نے تيرہ ہزار پولنگ اسٹيشن قائم کيے تھے۔ خطے کی کُل آبادی 7.6 ملين افراد پر مشتمل ہے، جس ميں سے ساڑھے پانچ ملین ووٹ ڈالنے کے اہل تھے۔