ڈورٹمنڈ کو جرمن چیمپئن بننے کے لیے صرف ایک جیت کی ضرورت

31 ویں میچ ڈے کے تیسرے اور آخری روزر دو میچ کھیلے گئے ۔کولون اور مؤنشن گلاڈ باخ کے مابین کھیلے گئے میچ کا نتیجہ تین صفر کے ساتھ گلاڈ باخ کے حق میں رہا۔ اس طرح موجودہ سیزن میں کولون کی غیر متاثر کن کارکردگی کا سلسلہ برقرار رہا۔ سیزن کے اختتام سے چند میچ قبل ہی کولون ٹیم کی کوچنگ کی ذمہ داری ایک مرتبہ پھر فرنک شیفر کو سونپ دی گئی ہے۔ تاہم اس تبدیلی کا بھی کوئی مثبت نتیجہ برآمد نہیں ہو سکا۔ کولون کو پچھلےچھ میں سے پانچ میچوں میں شکست کا سامنا کرنا پڑا ہے جبکہ ایک میچ برابر رہا تھا۔

جہاں کولون کے بنڈس لیگا کے دوسرے درجے میں پہنچنے کے خطرات مزید بڑھ گئے ہیں وہیں مؤنشن گلاڈ باخ کے چیمپئنز لیگ میں کھیلنے کے امکانات مزید روشن ہو گئے ہیں۔ گلاڈ باخ کی ٹیم اس وقت پوائنٹس ٹیبل پر چوتھی پوزیشن پر ہے اور اس کے 56 پوائنٹس ہیں۔ شالکے 57 پوائنٹس کے ساتھ تیسرے نمبر پر ہے۔ مؤنشن گلاڈ باخ کے ابھی تین میچ باقی ہیں اور بنڈس لیگا کے تین سرفہرست کلبس چیمپئنز لیگ کھیلنے کے اہل ہوتے ہیں۔ اتوار کے روز کھلیے گئے ایک اور میچ میں فرائی برگ اور ہوفن ہائم ایک دوسرے کے مد مقابل تھے۔ اس میچ میں کوئی بھی ٹیم گول نہیں کر سکی۔

اکتیسویں میچ ڈے میں ہفتے کے دن کل چھ میچ کھیلے گئے۔ اس روز شائقین اور ماہرین کی نگاہیں پوائنٹس ٹیبل کی سرفہرست ٹیم ڈورٹمنڈ اور تیسرے نمبر کی ٹیم شالکے کے میچ پر تھیں۔ ڈورٹمنڈ نے شالکے کو ایک کے مقابلے میں دو گولوں سے شکست دی۔ اب ڈورٹمنڈ کلب کے پوائنٹس کی تعداد 72 ہو گئی ہے۔ شالکے کے 57 پوائنٹس ہیں اور اب صرف تین میچ ڈیز باقی رہ گئے ہیں۔ شالکے اپنے بقیہ میچز جیت کر بھی 72 کے ہندسے کو عبور نہیں کر سکتا۔ اس طرح دفاعی چیمپئن ڈورٹمنڈ کے اپنے اعزاز کا دفاع کرنے کے امکانات مزید روشن ہو گئے ہیں۔ تیسویں میچ ڈے کے دوران دفاعی چیمپئن نے ٹورنامنٹ کے سب سے بڑی چیلنجر بائرن میونخ کو ہرایا اور اکتیسویں میچ ڈے میں ڈورٹمنڈ کے ہاتھوں شالکے کو شکست کا سامنا کرنا پڑا۔ اس طرح چار دنوں کے دوران ڈورٹمنڈ نے بنڈس لیگا کے رواں سیزن کی دو اہم ٹیموں کو شکست دی۔

ہفتے کے روز ایک اور اہم میچ ریکارڈ چیمپئن بائرن میونخ کا تھا لیکن وہ مائنز کے خلاف یہ میچ جیتنے میں ناکام رہی۔ دونوں ٹیمیں میچ کے دوران کوئی گول نہ کر سکیں اور اس طرح یہ میچ بغیر کسی گول کے برابری پر ختم ہوا۔ اس میچ کے برابر رہنے سے بائرن کے چیمپئن بننے کے امکانات بہت معدوم ہو گئے ہیں۔ اس کے پوائنٹس کی تعداد 64 ہے۔ اگر بتیسویں میچ ڈے میں ڈورٹمنڈ اپنا ایک میچ بھی جیت جاتی ہے تو وہ چیمپئن شپ جیت جائے گی کیونکہ بقیہ دو میچ ڈیز جیت کر بھی میونخ کی ٹیم ڈورٹمنڈ کے پوائنٹس سے آگے نہیں نکل سکے گی۔

ہفتے کے روز کھیلے گئے دیگر میچوں میں لیورکوزن اور ہیرتھا کے درمیان میچ تین تین گول سے برابر رہا۔ تنزلی کی شکار کائزرز لاؤٹرن کو نیورمبرگ کی ٹیم سے دو گول سے شکست ہوئی۔ وولفس برگ کو آؤگس برگ نے ایک گول کے فرق سے مات دی۔ ہینوور کلب کو ہیمبرگ کی ٹیم سے ہارنا پڑا۔ جمعے کو شروع ہونے والے میچ ڈے کے پہلے دن صرف ایک میچ کھیلا گیا۔ اس واحد میچ میں اشٹٹ گارٹ نے بریمن کو ایک گول کے مقابلے میں چار گول سے ہرایا۔

ai,ah/ss,ai ( Ap, AFP )