چینی کھلاڑی لی نا آسٹریلین اوپن کی فاتح

لی نا آسٹریلین اوپن گرینڈ سلیم ٹورنامنٹ جیتنے والی پہلی ایشیائی خاتون بن گئی ہیں۔ بتیس سالہ خاتون کھلاڑی کوئی گرینڈ سلیم جیتنے والی معمر ترین خاتون بھی قرار پائی ہیں۔ سن دو ہزار گیارہ میں لی نا نے فرنچ اوپن ٹورنامنٹ جیتا تھا۔ آسٹریلین اوپن ان کا دوسرا گرینڈ سلیم ٹائٹل ہے۔

ہفتے کو کھیلے گئے فائنل کے پہلے سیٹ میں لی نا کو سخت مقابلہ کرنا پڑا تاہم دوسرا سیٹ انہوں نے باآسانی جیت لیا۔ انہوں نے اپنی حریف کو سات چھ اور چھ صفر سے ہرایا۔

سن دو ہزار گیارہ اور بارہ میں بھی لی نا آسٹریلین اوپن کے فائنل تک پہنچی تھیں تاہم وہ دونوں مرتبہ رنر اپ ہی رہیں۔ اس بار ان کا آسٹریلین اوپن جیتنے کا خواب بالآخر پوار ہو گیا۔

آسٹریلین اوپن میں اس برس کئی اپ سیٹس دیکھنے میں آئے۔ سیرینا ولیمز اور ماریا شراپووا ٹورنامنٹ جیتنے کے لیے پسندیدہ سمجھی جا رہی تھیں تاہم وہ شروع کے راؤنڈز ہی میں باہر ہو گئیں۔

مردوں کا فائنل اتوار کے روز ہسپانوی ٹینس کھلاڑی رافائل نادال اور سویڈن سے تعلق رکھنے والے واورنکا کے درمیان کھیلا جائے گا۔ نادال نے جمعے کے روز سابق عالمی نمبر ایک کھلاڑی راجر فیڈرر کو تین سیٹس میں شکست دے کر فائنل تک رسائی کی ہے۔ فیڈرر نے کوارٹر فائنل میں برطانوی کھلاڑی اینڈی مرے کو ہرایا تھا اور ان کی زبردست فارم کی وجہ سے خیال کیا جا رہا تھا کہ وہ اپنا اٹھارواں گرینڈ سلیم جیت پائیں گے۔ تاہم نادال فیڈرر کے لیے انتہائی طاقت ور ثابت ہوئے اور انہوں نے فیڈرر کو جم کے کھیلنے کا موقع ہی نہ دیا۔

نادال تیزہ گرینڈ سلیمز جیت چکے ہیں۔ اگر وہ اتوار کو واورنکا سے جیت جاتے ہیں تو وہ چودہ گرینڈ سلیمز کے فاتح ہو جائیں گے اور سابق عالمی نمبر ایک امریکی کھلاڑی پیٹ سمپراس کے گرینڈ سلیمز کے برابر آ کھڑے ہوں گے۔ نادال وہ پہلے کھلاڑی بھی بن جائیں گے جس نے چاروں گرینڈ سلیم دو مرتبہ جیتے ہوں گے۔

فیڈرر نے میچ ہارنے کے باوجود بھی مایوسی کا اظہار نہیں کیا۔ ان کا کہنا ہے کہ اپنے کیریر کی بہترین ٹینس وہ ابھی کھیلیں گے، اور یہ کہ وہ مقابلہ کرتے رہیں گے۔

دوسری جانب واورنکا نے فائنل میں نادال کو ہرانے کے عزم کا اظہار کیا ہے۔ اگر وہ اتوار کو یہ میچ جیت گئے تو ان کی عالمی رینکنگ نمبر تین ہو جائے گی۔