چینی سولر پینلز پر درآمدی ڈیوٹی عائد کرنے کا فیصلہ

برسلز میں ہونے والے یورپی یونین کے تجارتی کمیشن کے اجلاس میں اتفاق کیا گیا ہے کہ چین سے درآمد ہونے والی غیر میعاری اشیاء کے ڈھیر لگانے کی بجائے ایسے اقدامات کیے جائیں، جن سے ان اشیاء کی درآمد کو روکا جائے۔ چین نے اس فیصلے پر اپنے تحفظات کا اظہار کرتے ہوئے اس حوالے سے مذاکرات کی ضرورت پر زور دیا ہے۔

چینی سولر سیلز پر ڈیوٹی عائد کرنے کی یہ تجویز یورپی تجارتی کمیشن کے سربراہ کارل ڈی یوخٹ Karel De Gucht's کی جانب سے پیش کی گئی تھی اور کمیشن کے تمام ارکان نے اس تجویز کی حمایت کی۔ یوخٹ کا کہنا تھا کہ چینی سولر پینل میں صارفین کی دلچسپی کی واحد وجہ اس کی کم قیمت ہے۔ ڈیوٹی عائد کرنے سے اس کی قیمیت میں اضافہ ہوجائے گا اور خریدار کے لیے اس میں موجود کشش ختم ہوجائےگی۔

برسلز سے موصولہ اطلاعات کے مطابق اس ڈیوٹی کا اطلاق ابتدائی طور پر 6 جون سے ہوگا۔ اس خبر کے منظر عام پر آتے ہی بازار حصص میں جرمن سولر سیل بنانے والے اداروں فونیکس سولر، سولر ورلڈ اور سینٹرو تھیرم کے حصص کی قیمتوں میں تیزی دیکھی گئی ہے۔ دوسری طرف چینی سولر سیل بنانے والے کمپنی چائنہ سن ٹیک کے حصص تیزی سے گر گئے ہیں۔

اگرچہ چین یورپی یونین کا ایک اہم تجارتی ساتھی ہے لیکن پھر بھی کساد بازاری کے شکار اس بلاک نے اس مخصوص حوالے سے اپنے تحفظات برقرار رکھے ہیں۔ عالمی تجارتی تنطیم WTO میں چین کے سفیر شی زیاژون نے یورپی بلاک کے اس فیصلے کو ایک بڑے غلطی قرار دیا ہے۔ انہوں نے اس حوالے چین کی جانب سے کسی ممکنہ ردعمل کے سوال کا جواب دینے سے انکار کردیا۔

zb/ab(AP)