چینی ذرائع ابلاغ میں قومی کھلاڑیوں کا چرچا

بیجنگ اولمپکس میں چین نے 51 طلائی تمغوں کے ساتھ مجموعی طور پر 100 طلائی تمغے جیتے تھے۔ چین نے رواں اولمپکس کا پہلا طلائی تمغہ جیت کر ہی اپنے عزائم واضح کر دیے اور دو روز میں سونے کے چھ، چاندی کے چار اور کانسی کے دو تمغوں کے ساتھ مجموعی طور پر بارہ تمغے اپنے نام کر لیے ہیں۔ چین کی سرکاری خبر رساں ایجنسی سنہوا نے اپنی رپورٹ میں لکھا ہے کہ قومی کھلاڑیوں نے پہلے روز شاندار کارکردگی کے بعد اتوار کو نشانہ بازی اور ڈائیونگ میں بھی سونے کے تمغے جیتے۔

چینی زبان کے روزنامے ہونان کو دیے گئے ایک انٹرویو میں سپورٹس بیورو کے ڈپٹی ڈائریکٹر Xiong Ni نے کا کہنا تھا کہ Springboard Synchronized میں گولڈ میڈل کی فاتح چینی جوڑی Wu Minxia اور He Zi دراصل ایک ''ڈریم ٹیم'' ہے۔ اس چینی عہدیدار کو امید ہے کہ یہ 'ڈریم ٹیم' لندن میں ڈائیونگ کے تمام آٹھ طلائی تمغے جیت لے گی۔ حکومتی جماعت کے روزنامے پیپلز ڈیلی نے اتوار کو چینی کھلاڑیوں کی کارکردگی کے لیے 'حیران کن' کے الفاظ استعمال کیے۔

میڈیا کے اس چرچے کے برعکس لندن اولمپکس میں چینی وفد کے عہدیدار احتیاط اور انکساری کا مظاہرہ کر رہے ہیں۔ ان کی جانب سے نہ تو اس بار بیجنگ اولمپکس سے زیادہ تمغے جیتنے کی بات کی جا رہی ہے اور نہ کسی قسم کا کوئی دوسرا ہدف مقرر کیا گیا ہے۔ ایک اور چینی روزنامے زینگشو نے اپنی رپورٹ میں لکھا ہے کہ اگر چینی کھلاڑیوں نے اپنی روایتی قوت کا مظاہرہ کیا تو اس کے حصے میں کم از کم 40 طلائی تمغے ضرور آئیں گے۔ چین کی نیم سرکاری خبر رساں ایجنسی چائنا نیوز سروس کو البتہ بھروسہ ہے کہ چینی دستہ بیجنگ کے 51 طلائی تمغوں کا ریکارڈ تو ہر حال میں برابر کر ہی دے گا۔

چین کے لیے قدرے تشویش کی بات یہ ہے کہ اس کے دو کھلاڑی ایسے کھیلوں میں ناکام ہوئے جن میں چین عمومی طور پر خاصی اچھی کارکردگی دکھاتا ہے یعنی وزن اٹھانے اور بیڈمنٹن میں۔ پیپلز ڈیلی نے ان ناکامیوں کی وجہ سے لندن اولمپکس کے لیے کھلاڑیوں کے انتخاب پر سوال اٹھایا ہے۔

(sks/ aa (Reuters