پاکستانی وزیر خارجہ اسحاق ڈار کا دورہ بنگلہ دیش اہم کیوں؟

پاکستان کے وزیر خارجہ اور نائب وزیر اعظم اسحاق ڈار نے اتوار کے دن ڈھاکا میں بنگلہ دیشی مشیر خارجہ ایچ ای ایم ڈی توحید حسین اور دیگر اعلیٰ عہدیداران کے  ساتھ تفصیلی ملاقاتیں کیں۔ ان کی کوشش ہے کہ دونوں ممالک کے تعلقات کو دوبارہ استوار کیا جا سکے۔

سن1971 میں بنگلہ دیش کے معرض وجود میں آنے کے بعد پاکستان اور بنگلہ دیش ایک دوسرے کے کٹر دشمن رہے۔ تاہم اب صورتحال میں تبدیلی دیکھی جا رہی ہے۔ 

اسحاق ڈار سن 2012 کے بعد ڈھاکا کا دورہ کرنے والے سب سے سینئر پاکستانی عہدیدار ہیں جبکہ اسلام آباد نے اس دورے کو ''پاکستان اور بنگلہ دیش تعلقات میں ایک اہم سنگ میل‘‘ قرار دیا ہے۔

توقع ہے کہ دونوں مسلم اکثریتی ممالک ڈار کے اس دورے کے دوران متعدد معاہدوں اور سمجھوتوں پر دستخط کریں گے، جن میں تجارتی معاہدے بھی شامل ہیں۔

پاکستان کی وزارت خارجہ نے کہا ہے کہ ڈار بنگلہ دیش کے عبوری رہنما محمد یونس سے ملاقات کریں گے۔

تجزیہ کاروں کا کہنا ہے کہ ہمسایہ ملک بھارت، جس نے مئی میں پاکستان کے ساتھ چار روزہ جنگ لڑی، اس پیش رفت پر گہری نظر رکھے گا۔

شیخ حیسنہ کے بعد کا بنگلہ دیش

ڈھاکا اور نئی دہلی کے تعلقات اگست 2024ء میں اس وقت سرد مہری کا شکار ہوگئے تھے، جب بنگلہ دیش میں ایک عوامی بغاوت نے وزیر اعظم شیخ حسینہ کی آمرانہ حکومت کا خاتمہ کر دیا تھا اور وہ بھارت فرار ہو گئی تھیں۔

امریکی تجزیہ کار مائیکل کوگلمان نے ڈار کے اس دورے سے قبل تبصرہ کرتے ہوئے کہا تھا کہ بنگلہ دیش بھارت کا سب سے قریبی شراکت دار رہا ہے اور اب وہ بھارت کے سب سے بڑے حریف سے تعلقات بڑھا رہا ہے۔

پاکستان اور بنگلہ دیش نے گزشتہ سال سمندری تجارت کا آغاز کیا تھا اور فروری میں حکومت سے حکومت کی سطح پر تجارتی سرگرمیوں کو وسعت دی تھی۔

 اسحاق ڈار کے اس دورے سے قبل پاکستانی وزیر تجارت جام کمال خان نے جمعرات کو ڈھاکا میں مذاکرات کیے، جہاں انہوں نے تجارت اور سرمایہ کاری کو فروغ دینے کے لیے مشترکہ کمیشن قائم کرنے پر اتفاق کیا۔

جمعہ کے روز دونوں ممالک کے اعلیٰ فوجی کمانڈروں نے پاکستان میں ملاقات کی تھی۔

’بھارت کے لیے ایک اسٹریٹیجک دھچکہ‘

نوبل امن انعام یافتہ یونس کی سربراہی میں بنگلہ دیش کی عبوری حکومت بھارت سے اس بات پر سخت ناراض ہے کہ اس نے حسینہ کو پناہ دی ہوئی ہے۔ حسینہ واجد انسانیت کے خلاف جرائم کے الزامات پر اپنے مقدمے میں پیش ہونے سے انکار کر رہی ہیں۔

انٹرنیشنل کرائسس گروپ کے تھامس کین کا کہنا ہے کہ حسینہ واجد کو اقتدار سے الگ کر دیا جانا، بھارت کے لیے ایک تزویراتی دھچکا تھا جبکہ اب بنگلہ دیش اور پاکستان کے درمیان بہتر ہوتے تعلقات اس کے براہ راست نتائج ہیں۔

ڈھاکا نے اسی ماہ بھارت پر الزام لگایا ہے کہ وہ حسینہ کی عوامی لیگ پارٹی کی حمایت کر رہا ہے، جو اب بنگلہ دیش میں کالعدم قرار دی جا چکی ہے۔ تاہم نئی دہلی نے اس الزام کو مسترد کرتے ہوئے کہا کہ وہ اپنی سرزمین کو کسی دوسرے ملک کے خلاف سیاسی سرگرمیوں کے لیے استعمال ہونے کی اجازت نہیں دیتا۔

ادارت: عاطف توقیر