پاکستانی طالبان کی طرف سے جنگ بندی کا اعلان

تحریک طالبان پاکستان کے ترجمان شاہد اللہ شاہد کی طرف سے ہفتے کے روز میڈیا رپورٹرز کو ایک بیان بذریعہ ای میل بھیجا گیا ہے۔ اس بیان کے مطابق، ’’طالبان کی سینیئر قیادت نے تمام ذیلی گروپوں کو کہا ہے کہ وہ طالبان کی طرف سے جنگ بندی کے اعلان کا احترام کریں اور اس وقفے کے دوران تمام تر جہادی کارروائیوں سے باز رہیں۔‘‘

طالبان کی طرف سے یکطرفہ جنگ بندی کا یہ اعلان دراصل پاکستانی حکومت اور طالبان کی نمائندہ کمیٹیوں کے درمیان امن مذاکرات ناکام ہونے کے بعد سامنے آیا ہے۔ پاکستانی حکومت اور طالبان کی نمائندگی کرنے والی کمیٹیوں کے درمیان یہ مذاکرات اس وقت منقطع ہو گئے تھے جب طالبان کے ایک گروپ کی طرف سے اعلان کیا گیا کہ اس نے اپنے قبضے میں موجود پاکستانی پیراملٹری فورسز کے 23 جوانوں کو ہلاک کر دیا ہے۔

طالبان کے ساتھ مذاکرات کے ذریعے امن کی بحالی میں ناکامی کے بعد حکومت کی جانب سے طالبان کے ٹھکانوں کو نشانہ بنانے کا عمل شروع کر دیا گیا تھا۔ حالیہ دنوں کے دوران پاکستانی ایئرفورس نے ملک کے شمال مغرب میں واقع قبائلی علاقوں میں طالبان کے متعدد مبینہ ٹھکانوں کو نشانہ بنایا ہے۔ اس کے علاوہ اس بات کی بھی اطلاعات ہیں کہ پاکستانی فوج افغانستان کی سرحد کے قریب شمالی وزیرستان کے علاقے میں شدت پسندوں کے خاتمے کے لیے ملٹری آپریشن شروع کرنے والی ہے۔

پاکستانی طالبان کی طرف سے حکومت سے مطالبہ کیا جاتا ہے کہ وہ موجودہ نظام حکومت کو ترک کر کے ملک میں شریعت نافذ کرے۔ طالبان کی طرف سے پاکستانی فوج اور عوامی مقامات کو نشانہ کے سبب اب تک ہزاروں پاکستانی شہری اور سکیورٹی اہلکار ہلاک ہو چکے ہیں۔