پاکستانی طالبان سے مکالمت کے مطالبے: حالات اور امکانات

ایسے میں افغانستان میں موجود امریکی اور اتحادی افواج کے بعض اقدامات بھی پاکستان کو درپیش مسائل میں اضافے کا باعث بن رہے ہیں۔

عسکریت پسند تنظیموں کی جانب سے بھی کئی ایک نے مذاکرات کی تجویز کا مثبت جواب دیا ہے تاہم بعض ماہرین کا کہنا ہے کہ طالبان کے نام سے درجنوں کالعدم تنظیمیں اکٹھی ہو چکی ہیں لہٰذا ایسے میں مذاکرات کس کے ساتھ کیے جائیں گے۔

عوامی نیشنل پارٹی سمیت کئی سیاسی جماعتیں مذاکرات کوپہلی ترجیح قرار دیتی ہیں۔ تاہم بدھ اور جمعرات کی درمیانی رات ایک مبینہ امریکی ڈرون طیارے سے کیے گئے میزائل حملوں کے نتیجے میں عسکریت پسندوں کے ایک گروپ کا سربراہ مولوی نذیر، اس کا نائب کمانڈر راتھا خان اور آٹھ دیگر عسکریت پسند مارے گئے۔ اسی طرح ایک اور ڈرون حملے میں طالبان کے حکیم اللہ محسود گروپ کے ایک اہم کمانڈر فیصل اور اس کے ساتھیوں کو نشانہ بنایا گیا۔ وانا اور میر علی میں کیے گئے ان حملوں میں مجموعی طور پر 13افراد ہلاک ہوئے، جس کا رد عمل پاکستان کے قبائلی علاقوں اور خیبر پختونخوا میں سامنے آنے کے امکانات کو رد نہیں کیا جا سکتا۔

یہی وجہ ہے کہ قبائلی عمائدین اور بعض سیاستدان ڈرون حملوں کو دہشت گردی میں اضافے کا باعث قرار دیتے ہوئے ان کے بند کیے جانے کے مطالبے کرتے ہیں۔ وزیرستان سے تعلق رکھنے والے قبائلی جرگے کے رکن حاجی شہزاد وزیر کا کہنا ہے، ’ڈرون حملے فوری طور پر بند ہونے چاہییں کیونکہ ان سے متعلقہ افراد کم اور عام شہری زیادہ مارے جاتے ہیں۔ ابھی تو ان حملوں کا کوئی جواز بھی باقی نہیں رہا کیونکہ جن غیر ملکی جنگجوؤں کی بات کی جاتی رہی ہے، وہ سب کے سب افغانستان میں ہیں اور افغانستان کے کئی علاقوں پر ان کا مکمل کنٹرول بھی ہے‘۔

لیکن حکومتی اتحاد میں شامل عوامی نیشنل پارٹی کا موقف اس سے بالکل مختلف ہے۔ پارٹی کے سربراہ اسفندیار ولی خان کا کہنا ہے کہ جو لوگ ڈرون حملوں کو پاکستانی فضائی حدود کی خلاف ورزی قرار دینے کا رونا روتے ہیں، انہیں زمینی خلاف ورزی دکھائی نہیں دیتی؟

اے این پی بھی طالبان کے ساتھ مذاکرات کے حق میں ہے تاہم اس پارٹی نے عسکریت پسندوں کے لیے ہتھیار پھینک کر حکومتی عملداری تسلیم کرنے کی جو شرط عائد کر رکھی ہے، اسے ماننے کے لیے شدت پسندوں کا کوئی بھی گروہ تیار نہیں۔ اے این پی کے سینئر رہنما بشیر احمد بلور کے ایک حالیہ خود کش حملے میں مارے جانے کے بعد سے پارٹی کی اکثریت قبائلی علاقوں میں مؤثر آپریشن کے حق میں ہے جبکہ ڈرون حملوں کے بارے میں بھی اس کے موقف میں تبدیلی آ گئی ہے۔

اس کے برعکس پاکستان تحریک انصاف ڈرون حملوں کو پاکستان کی سالمیت اور خود مختاری کے منافی قرار دیتی ہے۔ پاکستان تحریک انصاف کے صوبائی سربراہ اسد قیصر کا کہنا ہے، ’پاکستانی حکومت میں یہ صلاحیت ہونی چاہیے کہ وہ ملکی سرحدوں کے تحفظ کو یقینی بنائے۔ اگر کوئی ملک پاکستان کی فضائی اور زمینی سرحدوں کی خلاف ورزی کرتا ہے، تو پاکستان کو بھی ویسی ہی پالیسی اپنانی چاہیے جیسی دوسرے ملک اپناتے ہیں‘۔

جہاں تک عسکریت پسندوں کے ساتھ مذاکرات کی بات ہے، تو ماضی میں سکیورٹی اداروں نے 2004ء میں وزیرستان کے علاقے شگئی میں پہلا امن معاہدہ کیا تھا۔ امن معاہدوں کا یہ سلسلہ 2008ء تک جاری رہا تھا لیکن یہ معاہدے بھی علاقے میں قیام امن کا باعث نہیں بن سکے تھے۔

رپورٹ: فرید اللہ خان، پشاور

ادارت: مقبول ملک