وزیر اعظم عمران خان پہلی مرتبہ جی ایچ کیو میں

پاکستانی فوج کے ترجمان میجر جنرل آصف غفور نے عمران خان کی جی ایچ کیو آمد کے حوالے سے ٹوئٹر پر اپنے ایک پیغام میں بتایا کہ ملکی فوج کے سربراہ جنرل قمر جاوید باجوہ نے وزیر اعظم عمران خان کا استقبال کیا۔ جنرل غفور کے مطابق عمران خان کے ہمراہ وفاقی وزیر دفاع، وزیر خارجہ، وزیر داخلہ، وزیر خزانہ اور وفاقی وزیر اطلاعات بھی موجود تھے۔

قبل ازیں پیر 27 اگست کو ملکی فوج کے سربراہ نے عمران خان سے ملاقات کی تھی۔ فوج کے ترجمان کے مطابق جی ایچ کیو کے دورے کے دوران وزیر اعظم کو دفاعی اور داخلی سکیورٹی کے امور کے علاوہ دیگر پیشہ ورانہ معاملات پر بریفنگ دی گئی۔

جنرل آصف غفور کی عمران خان کے دورہ جی ایچ کیو کے بارے میں کی گئی ٹوئیٹ کو اب تک دس ہزار سے زائد افراد پنسد کر چکے ہیں اور ہزاروں نے اسے ری ٹوئیٹ بھی کیا۔ پاکستان میں فوج اور سول حکومت کے تعلقات ہمیشہ ایک نازک معاملہ رہے ہیں۔

پاکستانی صحافی کامران خان نے اس دورے کو ’سول ملٹری تعلقات کا شاندار آغاز‘ قرار دیتے ہوئے یہ بھی لکھا کہ انہیں ’یاد نہیں پڑتا کہ آخری مرتبہ جی ایچ کیو میں ایسی میٹنگ کب ہوئی تھی‘۔ کئی دیگر ٹوئٹر صارفین نے بھی اس امر پر خوشی کا اظہار کیا کہ ’فوج اور سول حکومت ایک صفحے پر‘ دکھائی دے رہے ہیں۔

حسن ملک نامی ایک ٹوئٹر صارف نے اس بارے میں رائے کا اظہار کرتے ہوئے پوچھا کہ کیا کوئی ایسی تصویر بھی جاری کی گئی جس میں ’چیف آف آرمی اسٹاف وزیر اعظم کو سلیوٹ کر رہے ہوں؟‘

شبیر نامی ایک ٹوئٹر صارف نے تاہم وزیر اعظم کے جی ایچ کیو جانے پر تنقید کرتے ہوئے سوال کیا کہ کیا یہ ’وزیر اعظم کے پروٹوکول کے خلاف نہیں ہے‘۔