نصف صدی بعد امریکی صدر کا دورہ ملائیشیا

سابق صدر لِنڈن جانسن کے بعد اوباما ملائیشیا کا دورہ کرنے والے پہلے امریکی صدر ہے۔ جانسن 1966ء میں ملائیشیا گئے تھے۔ باراک اوباما ایسے وقت ملائیشیا پہنچے ہیں جب کوالالمپور حکومت کو اختیارات کے ناجائز استعمال کے الزامات اور ملائیشیا ایئر لائنز کا ایک طیارہ لاپتہ ہونے پر تنقید کا سامنا ہے۔

خبر رساں ادارے اے ایف پی کے مطابق باراک اوباما کے اس دورے کا مقصد اس مسلم اکثریتی ملک کے ساتھ دُوریوں کو ختم کرنا ہے۔ واشنگٹن انتظامیہ اقتصادی لحاظ سے کامیاب اس ایشیائی ریاست کے ساتھ اپنے تعلقات بہتر بنانے میں دلچسپی رکھتی ہے۔

ملائیشیا بھی امریکا کے ساتھ سرگرم تعلقات کا خواہاں ہے۔ تاہم یہ امر بھی اہم ہے کہ یہ چین کا بھی قریبی تجارتی حلیف ہے اور اوباما کے ٹرانس پیسیفک پارٹنرشپ (ٹی پی پی) معاہدے کے اہم پہلوؤں پر پس و پیش کا اظہار کر چکا ہے۔

خیال ظاہر کیا جا رہا ہے کہ اوباما ملائیشیا کے وزیر اعظم نجیب رزاق سے ملاقات میں اس تجارتی معاہدے کے بارے میں ان کی حکومت کے تحفظات دُور کرنے کی کوشش کریں گی۔

دوسری جانب ملائیشیا کے اپوزیشن رہنما انوار ابراہیم نے ہفتے کو ایک بیان میں حکومت کو بدعنوان قرار دیتے ہوئے اوباما پر زور دیا ہے کہ وہ جمہوریت اور آزادی کے لیے آواز اٹھائیں۔

ان کا کہنا تھا: ’’یہ ایک اہم موقع ہو گا کہ اوباما اپنے ان نظریات پر پورے اتریں جن کا اظہار انہوں نے اپنی مہم اور اپنی حکومت کے ابتدائی دِنوں میں کیا تھا۔‘‘

امریکا اور ملائیشیا کے تعلقات 1981ء سے 2003ء تک مہاتیر محمد کے دَور میں سرد مہری کا شکار رہے۔ اگرچہ اس دَور میں بھی دونوں ملکوں کے تجارتی تعلقات مستحکم تھے لیکن مہاتیر محمد امریکی پالیسیوں کے سخت ناقد تھے۔

اس کے برعکس نجیب نے بیرون ملک خود کو اصلاحات پسند اور مذہبی لحاظ سے روشن خیال رہنما کے طور پر پیش کیا ہے اور وہ امریکا کے ساتھ تعلقات بہتر بنانے کی کوشش کرتے رہے ہیں۔ تاہم انہیں اپنے مخالفین کو ہراساں کرنے اور آزادئ اظہار پر قدغن لگانے جیسے الزامات پر تنقید کا سامنا ہے۔

اوباما اس دورے میں انوار ابراہیم سے ملاقات نہیں کریں گے تاہم وہ اتوار کو حکومت مخالف گروپوں کے نمائندوں سے ملاقات کریں گے۔

اے ایف پی کے مطابق دنیا کے دیگر تنازعات، بالخصوص یوکرائن کے معاملے میں روس کے ساتھ پائے جانے والے تنازعے نے اوباما کے اس دورہ ایشیا کے اصل مقاصد کو گہنا دیا ہے۔