ملالہ فنڈ سے سوات میں سپورٹس فیسٹول

ملالہ فنڈ کی جانب سے سوات کے مرکزی شہر مینگورہ کے مختلف میدانوں میں مَلک سعد سپورٹس فیسٹول پاچ روزتک جاری رہے گا۔ ملک سعد سپورٹس ٹرسٹ کے ضلعی منتظم محمد رحیم خیال کا کہنا ہے کہ یہ اپنی نوعیت کا تیسرا فیسٹول ہے اور اس سلسلے میں ہمارے ساتھ مختلف لوگ تعاون کرتے ہیں۔’’ اس سال فیسٹول ملالہ فنڈ کے تعاون سے منعقدکرایا جا رہا ہے اور ضیا ء الدین یوسف زئی نے بھی مکمل تعاون کی یقین دہانی کرائی ہے‘‘۔ انہوں نے مزید کہا کہ فیسٹول کے پہلے مرحلے میں کرکٹ، فٹ بال، باسکٹ بال اورجوڈو کراٹے کے مقابلے ہو رہے ہیں جبکہ دوسرے مرحلے میں والی بال، بیڈ منٹن اور دیگر کھیلوں کے مقابلےکرائے جائے گے۔

ملالہ فنڈ کے تعاون سے جاری پانچ روزہ ملک سعد سپورٹس فیسٹول میں14سے 40 سال تک کی عمر کے کھلاڑی حصہ لے رہے ہیں اور کھلاڑیوں نے بھی فیسٹول کے انعقاد پر مسرت کا اظہار کیا ہے۔ فٹ بال کے کھلاڑی شہزاد خان کا کہنا ہے کہ اس فیسٹول سےکھلاڑیوں کی حوصلہ افزائی ہو رہی ہے ’’سوات میں ٹیلنٹ کی کمی نہیں۔ ہم ملالہ فنڈ اور ضیا ء الدین یوسف زئی کے شکر گزار ہے، جو فیسٹول کے لیے فنڈنگ کرر ہے ہیں۔ ہمیں امید ہے کہ وہ آئندہ بھی سوات کے کھلاڑیوں کی حوصلہ افزائی کے لیے اقدامات اُٹھائیں گے‘‘۔

سوات میں ملالہ فنڈ کے نمائندے احمد شاہ خان کا کہنا ہے کہ سوات بہت عرصے تک دہشت گردی کا شکار رہا ہے جس کے باعث کھیلوں کی سرگرمیاں معطّل ہو گئی تھیں۔ فیسٹول کا انعقاد سوات کے لیے ہوا کا ایک تازہ جھونکا ثابت ہو گا۔ عرصے بعد سوات میں کھیلوں کی سرگرمیاں منعقد ہوئی ہے، جس میں لوگ دلچسپی لے رہے ہیں’’ ملالہ یوسف زئی کے والد ضیاء الدین یوسف زئی ملالہ فنڈ سے فیسٹول کے لیے مالی معاونت کر رہے ہیں اور فیسٹول کے تمام اخراجات، کھلاڑیوں کے لیے انعامات اور کھیلوں کا سازو سامان بھی ملالہ فنڈ کی جانب سے مہیا کیا جا رہا ہے۔ ملالہ فنڈ آئندہ بھی سوات میں کھیلوں کے مقابلے منعقد کرانے میں دلچسپی رکھتا ہے اور امید ہے کہ نوجوان نسل اور یہاں کے کھلاڑی اس سے مستفید ہوں گے‘‘۔

ملالہ فنڈ کی جانب سےسوات میں ملک سعد سپورٹس فیسٹول کے لیے مالی معانت پر جہاں ایک طرف کھلاڑیوں اور کھیلوں کی مختلف تنظیموں نے خوشی کا اظہار کیا ہے، تو وہیں دوسری طرف اس فیسٹول کو سوات میں کھیلوں کے فروغ کے لیے سود مند قرار دیا جا رہا ہے۔