مصری عوام کا فيصلہ نئے آئين کے حق ميں

مصری اليکشن کميشن کے سربراہ نبيل ثالب نے ہفتے کو اعلان کيا کہ ملک ميں سولہ اور سترہ جنوری کے روز کرائے جانے والے ريفرنڈم کے سرکاری نتائج کے مطابق 98.1 فيصد لوگوں نے فوج کے حمايت يافتہ اس نئے آئين کے حق ميں ووٹ ڈالا۔ مصر ميں رجسٹرڈ ووٹروں کی کل تعداد 53.4 ملين ہے اور ووٹر ٹرن آؤٹ 38.6 فيصد رہا۔ ثالب نے قاہرہ ميں ايک پريس کانفرنس سے خطاب کرتے ہوئے اعلان کيا، ’’رائے شماری ميں حصہ لينے والے 20.6 ملين ووٹروں ميں سے 19.9 فيصد لوگوں نے نئے آئين کی حمايت ميں فيصلہ کيا۔‘‘

مصر کے سرکاری اخبار الاحرام کے آن لائن ورژن ميں عبوری صدر عدلی منصور کے ترجمان کا حوالہ ديتے ہوئے لکھا گيا ہے کہ صدر آج اتوار کے روز قوم سے خطاب کريں گے۔ جرمن نيوز ايجنسی ڈی پی اے کے مطابق امکان ہے کہ آج کے اِس خطاب ميں منصور پارليمانی و صداراتی انتخابات کی حتمی تاريخوں کا اعلان کر ديں۔

واضح رہے کہ مصر کی اسلام پسند سياسی جماعت اخوان المسلمون کی جانب سے ریفرنڈم کا بائيکاٹ کيا گيا تھا۔ معزول صدر محمد مُرسی کا تعلق اِسی جماعت سے ہے۔ 2012ء میں مُرسی کی حکومت نے اسلامی آئین نافذ کیا تھا اور اُس وقت ووٹ ڈالنے والے 63.8 فيصد لوگوں نے اُس آئين کے حق ميں فيصلہ کيا تھا۔ مُرسی کی معزولی کے بعد سے یہ ملک بد امنی کا شکار ہے اور پر تشدد واقعات ميں سينکڑوں افراد ہلاک ہو چکے ہيں۔

مبصرین کے مطابق يہ نیا آئین بڑی حد تک سکیولر ہے۔ فوج کے حمايت يافتہ اِس نئے آئين کے مسودے میں مُرسی انتظاميہ کی متعارف کردہ بہت سی متنازعہ شقیں حذف کر دی گئی ہیں۔ اس کے علاوہ نئے آئين ميں چند نئی شقيں بھی متعارف کرائی گئی ہيں اور کچھ شقوں ميں ترميم کی گئی ہيں۔ اِس نئے آئین کے حامیوں کے مطابق اِس میں معاشرتی آزادیوں کی ضمانت دی گئی ہیں۔

ووٹنگ کے بعد اٹھائے جانے والے اقدامات اہم ہيں، جان کيری

امريکی وزير خارجہ جان کيری کے بقول محض ووٹنگ کا عمل ہی جمہوريت کا ضامن نہيں، بلکہ يہ اہم ہے کہ اُس کے بعد کيا اقدامات اٹھائے جاتے ہيں۔ اُنہوں نے ہفتے کے روز امريکی دارالحکومت واشنگٹن سے جاری کردہ اپنے بيان ميں کہا، ’’جيسے جيسے مصر ميں اقتدار کی منتقلی کا عمل آگے بڑھتا جا رہا ہے، امريکا مصری حکومت پر زور دیتا ہے کہ وہ عوام کے مفاد ميں اِس نئے آئين ميں شامل آزاديوں اور حقوق پر مکمل عمل در آمد کو يقينی بنائے۔‘‘

کيری کے بقول جِن بہادر مصری باشندوں نے قاہرہ کے التحرير اسکوائر پر اپنی جانوں کی پرواہ کيے بغير دھرنا دیا تھا، اُنہوں نے يہ سب اِس ليے نہيں کيا تھا کہ اُن کے حقوق اقتدار کی منتقلی کے عمل ميں کہيں کھو جائيں۔ امريکی وزير خارجہ نے مزيد کہا، ’’جمہوريت کسی ايک اليکشن يا ريفرنڈم سے کہيں زيادہ ہے۔ لوگوں کے مختلف رنگ و نسل، مذہب يا سياسی رجحانات کے باوجود اُنہيں يکساں حقوق اور قانون کے ذريعے حفاظت کی فراہمی کو جمہوريت کہا جاتا ہے۔‘‘