مشرقی یورپ کی سیاحت: لٹویا کی تسخیر

چھ لاکھ نفوس پر مشتمل ریگا لٹویا کا دارالحکومت ہے اور بحیرہ بالٹک کے کنارے پر ایک اعلیٰ معیار کا شہر ہے۔ اس کی کئی عمارتیں مختلف انداز کی ہیں اور قدیمی عمارتوں کو پوری طرح محفوظ رکھا گیا ہے۔ ریگا کا قدیمی حصہ یونیسکو کے عالمی ورثے میں شامل ہے۔ ریگا کی سینٹرل مارکیٹ اور سن 1935 میں تعمیر کی گئی فریڈم یادگار بھی دیکھنے کے قابل مقامات ہیں۔

لٹویا کے دارالحکومت ریگا کے نواح میں ایتھنو گرافی کا اوپن ایئر میوزیم ہے۔ یہ یورپ کا اپنی نوعیت کا سب سے بڑا میوزیم ہے جہاں اس خطے میں انسانوں کی زندگی بسر کرنے کے اطوار کا ایک مکمل ریکارڈ موجود ہے۔ اس میوزیم میں ایک سو تعمیر شدہ عمارتیں ہیں اور ان میں انسانوں کے استعمال کی ہزاروں اشیا رکھی ہوئی ہیں۔

نوے ہزار ہیکٹرز پر پھیلا گاؤژا نیشنل پارک شاندار قدرتی مناظر کا شاہکار ہے۔ یہ ریگا سے ایک گھنٹے کی مسافت پر واقع ہے۔ یہ ہائکنگ کے لیے آئیڈیل مقام ہے۔ موسم گرما میں اس کی جھیلوں میں کشتی رانی اور سرما میں اسکیینگ بہترین ذریعہ تفریح ہیں۔

ریگا سے چالیس کلومیٹر کی مسافت پر ساحلی قصبہ یورمالا واقع ہے۔ اس کا پچیس کلو میٹر طویل ریتیلا ساحل چہل قدمی اور سمندر میں نہانے کا پرسکون مقام ہے۔ اس میں انیسویں اور بیسویں صدی کے اوائل میں تعمیر کیے گئے لکڑی کے مکانات بھی دیکھنے کے لائق ہیں۔ ان لکڑی کے مکانات کا طرزِ تعمیر نہایت عمدہ ہے۔

کلڈیگا کا چھوٹا سے قصبہ تاریخی اعتبار سے نہایت اہم ہے۔ سیاحوں کی بھیڑ سے دور یہ قصبہ تاریخی عمارتوں سے بھرا ہے۔ اس قصبے میں بارہویں صدی میں پہلے پولستانی لیتھوینین اور پھر روسی قبضے کے دوران تحریک کا مرکز تھا۔

مہم جو سیاح لٹویا کے مغربی حصے میں واقع تاریخی کھنڈرات کو دیکھنے کو اہم خیال کرتے ہیں۔ لیپایا میں زار بادشاہوں کے دور میں پانی اور مٹی سے تعمیر کیے گئے وسیع قلعہ نما کھنڈرات ملتے ہیں۔ ان کا دورِ تعمیر بیسویں صدی کا ہے لیکن ان کو جلد ہی روسی بادشاہوں نے تعمیر کے بعد نظرانداز کر دیا تھا۔

اٹھارہویں صدی میں تعمیر کیا گیا یہ پرشکوہ محل جنوبی لٹویا میں ہے۔ باروک طرزِ تعمیر کے اس محل کو بحیرہ بالٹک کے کنارے پر فرانس کے ورسائے محل سے تعبیر کیا جاتا ہے، جو پیرس کے قرب میں واقع ہے۔ رونڈیل محل میں ایک سو تیس کمرے ہیں اور یہ سات ہزار مربع میٹر پر پھیلا ہوا ہے۔ محل کا پارک قریب دس ہیکٹرز اراضی پر پھلا ہوا ہے۔ اس کو مکمل دیکھنے کے لیے خاصا وقت درکار ہوتا ہے۔

جنوب مشرقی شہر ڈاؤگوپلز میں تجریدی آرٹ کا ایک بڑا میوزیم قائم ہے۔ یہ شہر روسی ملکہ ڈونسک سے منسوب ہے اور اسی نام سے پکارا بھی جاتا تھا۔ سن 2013 میں مارک روٹھکو آرٹ سینٹر میں تجریدی فن پاروں کو رکھنے کا سلسلہ شروع کیا گیا۔ یہ میوزیم ڈاؤگوپلز قلعے میں واقع ہے۔

لٹویا میں مختلف کھانے مقبول ہیں ان پر جرمن اور روسی اثرات پائے جاتے ہیں۔ ان میں پورک شینک اور مٹر کی پوری اہم ہیں۔ لٹویا کی بریڈ جو رائی یا موٹی گندم سے تیار کی جاتی ہے، وہ کئی ڈشوں کے ساتھ پیش کی جاتی ہے۔ یہ اس ملک کے طعام کی ثقافت میں اہم ہے۔

دوسرے یورپی ملکوں کی طرح لٹویا میں بھی عوام نے باقاعدگی سے یوکرین روسی فوجی چڑھائی کے خلاف احتجاجی ریلیاں نکالنے کا سلسلہ شروع کر رکھا ہے۔ ان میں احتجاجی پوسٹرز اور بینرز نمایاں ہوتے ہیں۔ لٹویا کے شہریوں کے مطابق یوکرینی جنگ نے سوویت قبضے کی تاریک یادوں کو زندہ کر دیا ہے۔