متنازعہ لسانی قانون کے خلاف یوکرائن میں عوامی احتجاج

یہ مظاہرین بدھ کی شام کییف میں ملکی پارلیمان کے سامنے اس لیے احتجاج کر رہے تھے کہ ایک روز قبل منگل کو ریاستی پارلیمان نے بڑی جلدی میں یہ قانون منظور کر لیا تھا کہ سابقہ سوویت یونین کی اس ریاست کے کچھ حصوں میں آئندہ اسکولوں اور مقامی حکومتی دفاتر میں بنیادی طور پر یوکرائن کی زبان کی بجائے روسی زبان استعمال کی جائے گی۔

اس عوامی مظاہرے کا اہتمام اپوزیشن سے تعلق رکھنے والے ارکان پارلیمان نے کیا تھا اور وہی کییف میں قومی قانون ساز ادارے کی عمارت کے سامنے مظاہرین کی قیادت کر رہے تھے۔ ان منتخب عوامی نمائندوں کا مطالبہ ہے کہ یوکرائن میں یوکرائن کی زبان ہی واحد سرکاری زبان ہونی چاہیے۔ ´

مظاہرین کی پولیس کے ساتھ جھڑپیں اس وقت شروع ہوئیں جب احتجاج کرنے والے شہری بہت بڑی تعداد میں پارلیمان کی بلڈنگ کے سامنے اس جگہ پر جمع ہو گئے جہاں صدر وکٹر یانوکووچ کو میڈیا سے خطاب کرنا تھا۔

منگل کے روز ملکی پارلیمان نے یہ متنازعہ قانون محض چند ہی منٹوں میں اس وقت منظور کر لیا تھا جب صدر یانوکووچ کے حامی ایک رکن پارلیمان نے ایوان میں اس بارے میں اچانک ہی ایک مسودہء قانون پیش کر دیا تھا۔ اس دوران اپوزیشن کے ارکان کو اس قانونی بل پر پارلیمانی رائے دہی کے لیے بہت ہی کم وقت ملا تھا اور نتیجہ ایوان کے اندر اور باہر سڑکوں پر ملکی صدر کے حامیوں اور مخالفین کے درمیان ہاتھا پائی کی صورت میں نکلا تھا۔

اس بل کی منظوری کے بعد یہ مسودہ اس وقت باقاعدہ قانون بن جائے گا جب پارلیمانی اسپیکر ولودیمیر لیٹوین  اور صدر یانوکووچ اس پر دستخط کر دیں گے۔ اسپیکر لیٹوین یہ پیشکش کر چکے ہیں کہ وہ اپنے عہدے سے استعفیٰ دینے پر تیار ہیں۔ لیکن صدر وکٹر یانوکووچ ابھی تک اس بل کے حامی ہیں۔ یہی وجہ ہے کہ یوکرائن کے کئی علاقوں میں روسی زبان کو سرکاری زبان کا درجہ دینے کی حکومتی کوششوں کے خلاف اپوزیشن کے حامی عام شہریوں نے منگل کی رات کو ہی اپنا احتجاج شروع کر دیا تھا۔ منگل اور بدھ کی درمیانی شب بہت سے مظاہرین اپنے احتجاج کے دوران رات بھر پارلیمان کی عمارت کے سامنے موجود رہے تھے۔

پھر بدھ کے دن بھی یہ عوامی احتجاج جاری رہا اور پولیس کی طرف سے مظاہرین پر لاٹھی چارج اور ان کے خلاف آنسو گیس کے استعمال نے صورت حال کو اور بھی کشیدہ بنا دیا۔

متنازعہ لسانی قانون سازی کی اس پارلیمانی کوشش کی وجہ سے یوکرائن میں اپوزیشن کو ایک نئی تحریک مل گئی ہے جو اپنی لیڈر اور سابقہ وزیر اعظم یولیا ٹیمو شینکو کے طویل عرصے سے زیر حراست ہونے کی وجہ سے ان مظاہروں سے پہلے تک کافی کمزور ہو چکی تھی۔

یوکرائن میں بدھ کے روز اپوزیشن کے اس احتجاج میں باکسنگ کے عالمی ہیوی ویٹ چیمپئن ویٹالی کلِچکو بھی شامل تھے جنہوں نے یوکرائن میں اپنی ایک اپوزیشن پارٹی بھی قائم کر رکھی ہے۔

یوکرائن کے کئی حصوں میں مقامی باشندوں کی مادری زبان روسی ہے کیونکہ وہاں ایک اقلیت کے طور پر روسی نسل کے باشندوں کی تعداد کافی زیادہ ہے۔

یوکرائن کے صدر یانوکووچ روسی صدر ولادیمیر پوٹن کے ایک قریبی اتحادی ہیں۔ پوٹن اگلے ہفتے یوکرائن کا سرکاری دورہ بھی کرنے والے ہیں جس دوران وہ یالٹا میں 12 جولائی کو صدر یانوکووچ سے ملاقات کریں گے۔

mm / ab / Reuters