قبرص: پیکج رَد کرنے کے سنگین نتائج

یورو زون اور بین الاقوامی مالیاتی فنڈ کے امدادی پیکج کی شرائط کے مسترد کیے جانے کا اقدام نہ صرف قبرص کے لیے بلکہ یورو زون کے دیگر سولہ ممالک کے لیے بھی دور رَس اثرات کا حامل ثابت ہو گا۔ دَس ارب یورو کا امدادی پیکج ایک ایسے ملک کے لیے فراخ دلانہ پیشکش تھی، جس کا بینکنگ کا شعبہ زوال پذیر ہے اور جو تقریباً دیوالیہ ہو چکا ہے۔

تاہم ناراض بینکوں کے ایماء پر نکوسیا کی پارلیمان نے اس پیکج کو رَد کرنے کے لیے ایک مضحکہ خیز دلیل دی۔ اس پیکج کا ہرگز یہ مقصد نہیں تھا کہ قبرص پر ایک غیر ملکی حکومت مسلط کی جا رہی ہے یا جرمنی طاقت کے بل بوتے پر اپنے مخصوص مفادات منوانا چاہتا ہے۔ نہیں، اِس کا مقصد اُس چھوٹی سی ریاست کو سہارا دینا تھا، جو تقریباً آئندہ جون تک ادائیگیوں کے قابل ہی نہیں رہے گی۔

خود قبرص کو تقریباً 5.8 ارب یورو کا انتظام کرنے کو کہا گیا تھا، جو ایک مناسب رقم تھی۔ اسی طرح یورو زون کے اِس فیصلے میں بھی نکوسیا حکومت خود شامل تھی کہ یہ رقم قبرصی بینک اکاؤنٹ ہولڈرز کی بچتی رقوم میں سے کاٹ لی جائے۔ اس میں تو اب کوئی شبہ نہیں رہا کہ گزشتہ کئی برسوں سے یہ جزیرہ ریاست اپنے وسائل سے کہیں زیادہ خرچ کرتی چلی آ رہی ہے۔ کم ٹیکسوں اور بینکوں کی نگرانی میں نرمی کے ذریعے بیرونی دنیا کو قبرص میں سرمایہ کاری کرنے کی ترغیب دینے کی جو پالیسی اختیار کی گئی تھی، وہ پہلے نہیں تو گزشتہ موسم گرما سے تو ناکام ہو چکی ہے۔ تب قبرص حکومت نے بین الاقوامی مالی امداد کی درخواست دے دی تھی کیونکہ ملکی بینکنگ سیکٹر مکمل طور پر ناکام ہو چکا تھا۔ یہ چھوٹی سی جزیرہ ریاست قرضوں کے بوجھ تلے دب کر رہ گئی تھی اور اس صورتِ حال میں ابھی بھی کوئی تبدیلی نہیں آئی ہے۔

اب اگر یورو زون کے ممالک قبرص کو آئندہ بھی اپنی کرنسی یونین میں شامل رکھنا چاہتے ہیں تو اُنہیں نکوسیا حکومت کے ساتھ فوری طور پر مذاکرات شروع کرنا ہوں گے۔ ابھی اس کے لیے جون تک کا وقت ہے، جب اگلی بڑی قسط کی ادائیگی کرنا ہو گی۔

یہ بات ناقابل فہم ہے کہ کیوں یورو زون کے وُزرائے خزانہ گزشتہ ہفتے کی صبح کو یہ اندازہ نہیں لگا سکے کہ اُن کی پیشکش پر قبرص میں کیا رد عمل ظاہر کیا جائے گا۔ یہ کہنا پڑے گا کہ یورو گروپ سے انتظامی معاملات میں اور ابلاغ میں شدید غلطیاں ہوئی ہیں۔

اُدھر قبرص حکومت کے پاس ابھی یہ موقع ہے کہ وہ کہیں اور سے رقم کا انتظام کر سکتی ہے۔ وہ بینک اکاؤنٹس سے جبری کٹوتی کی جگہ ٹیکسوں کی شرح میں بڑے پیمانے پر اضافہ کر سکتی ہے۔ اگر ایسا بھی نہ ہوا تو قبرص کا بینکنگ سیکٹر دیوالیہ ہو جائے گا۔ تب اُن اکاؤنٹس ہولڈرز کو اور بھی زیادہ نقصان ہو سکتا ہے، جنہیں اب اپنی بچتی رقوم کے محض 6.75 یا 9.9 فیصد سے ہاتھ دھونا پڑتے۔

قبرص کے بینک دیوالیہ ہو گئے تو خود اِس ملک کو بھی یورو زون سے نکلنا پڑے گا۔ پھر قبرصی شہریوں کو اپنی نئی ملکی کرنسی متعارف کرواتے ہوئے اپنے پاؤں پر کھڑا ہونے کی کوشش کرنا پڑے گی۔ تب نئی کرنسی کے ذریعے بچتی رقوم کی قدر و قیمت میں بڑے پیمانے پر کمی کا بھی امکان ہے۔

دوسری طرف یورو زون سے قبرص کے اخراج کے بعد کرنسی یونین پر دنیا بھر کے سرمایہ کاروں کے اعتبار کو دھچکا پہنچے گا۔ تب اسپین یا اٹلی کا قرضوں کا بحران نئے سرے سے سَر اُٹھا سکتا ہے۔

جمعرات اکیس مارچ سے قبرص میں بینک پھر سے کھلیں گے تو بینک اکاؤنٹ ہولڈرز کی کوشش یہ ہو گی کہ وہ اپنی زیادہ سے زیادہ رقم نکلوا سکیں۔ ایسا ہوا تو بھی وہاں کے بینک بہت جلد دیوالیہ ہو سکتے ہیں۔ چونکہ یورو زون کے دیگر ممالک کے بھی اس رجحان سے متاثر ہونے کا معمولی سا خدشہ موجود ہے، اس لیے اب یورو گروپ کے وُزرائے خزانہ کو لازمی طور پر کوئی ایسا منصوبہ وضع کرنا ہو گا، جس پر عمل کرتے ہوئے کسی ملک کو باقاعدہ ایک نظام کے تحت دیوالیہ ہونے دیا جا سکے اور یورو زون سے نکالا جا سکے۔

اگر یورو زون نے قبرص کو بہر صورت کرنسی یونین میں ساتھ لے کر چلنے کی کوشش کی تو بحرانوں کے شکار دیگر ممالک بھی اپنی بچتی کوششیں نرم کر دیں گے، جس سے امدادی ڈھانچوں کا پورا نظام ہی مشکلات کا شکار ہو کر رہ جائے گا۔

قبرص کے اراکين پارلیمان نے رائے شماری میں طاقتور یورپی یونین کے خلاف ووٹ تو دے دیا ہے لیکن اِس کی اُنہیں جو قیمت چکانا پڑے گی، وہ ناقابل اندازہ ہے۔ یہ قیمت بہت زیادہ بھی ہو سکتی ہے اور تب قبرص کی سڑکوں پر خوشی منانے والوں کے چہروں سے مسکراہٹ بہت جلد غائب بھی ہو سکتی ہے۔

B.Riegert/aa/zb