فرنچ اوپن: ولیمز سسٹرز آؤٹ

رواں برس کے ٹینس کے گرینڈ سلیم ٹورنامنٹ فرنچ اوپن میں اپ سیٹ کا سلسلہ پہلے راؤنڈ سے ہی شروع ہو گیا تھا۔ ویمن چیمپیئن شپ کے دوسرے راؤنڈ میں تو حیران کُن اپ سیٹ ہوا۔ امریکی اسٹار کھیلاڑی سیرینا ولیمز کودوسرے راؤنڈ میں شکست کا سامنا رہا۔ انہیں بیس سالہ غیر معروف ہسپانوی کھلاڑی گاربینے مُوگُورُوزا (Garbine Muguruza ) نے اسٹریٹ سیٹ میں ہرایا۔ دو سیٹ کے میچ میں سیرینا ولیمز صرف چار گیمز جیت سکیں۔ عالمی نمبر ایک امریکی کھلاڑی فرنچ اوپن جیتنے کے لیے فیورٹ خیال کی جا رہی تھیں۔ گاربینے کی عالمی رینکنگ میں پوزیشن تیس سے بھی نیچے ہے۔

یہ امر اہم ہے کہ فرانس میں یکدم بدلتے موسم کی وجہ سے بدھ کے روز سیرینا ولیمز کو زکام اور ہلکے بخار کی شکایت ہو گئی تھی لیکن انہوں نے میچ سے دستبردار ہونا درست خیال نہ کیا۔ اگر وہ یہ میچ جیت جاتیں تو اگلے راؤنڈ میں انہیں اپنی بہن وینس ولیمز کا سامنا ہوتا۔ دونوں بہنیں بدھ کے روز اپنے اپنے میچ ہار گئی تھیں۔ اب ہسپانوی کھلاڑی گاربینے مُگُورُوزا کو سلوواکیہ کی انا شمییڈلووا کا سامنا ہے۔ اب ٹورنامنٹ میں بہتر درجہ بندی کی حامل ماریا شاراپووا اور پولستانی کھلاڑی اگنیئشکا راڈوانسکا بچی ہیں۔ اگر یہ دونوں کھلاڑی کامیاب ہوتی رہیں تو ان کے درمیان فائنل میچ کا امکان ہے۔

سیرینا ولیمز اب تک سترہ مرتبہ گرینڈ سلیمز ٹورنامنٹس جیت چکی ہیں اور اس مرتبہ بھی وہ فیورٹ تھیں لیکن پیرس کی سرد ہوا نے اُنہیں اپنی لپیٹ میں لے لیا۔ اُن کی بہن وینس ولیمز گزشتہ چند مہینوں سے اپنی پنڈلی کے عضلات کی کمزوری کی وجہ سے مسلسل کھیل میں زوال کا سامنا کر رہی ہیں۔ میچ ہارنے کے بعد سیرینا ولیمز نے شکست کی وجہ اپنی علالت کے بجائے اپنے خراب کھیل کو قرار دیا۔ وہ کہتی ہے کہ آج ایک ایسا دن تھا کہ میں بہتر کھیل کا مظاہرہ نہیں کر سکی۔ دوسری جانب گاربینے مُوگُورُوزا نے اپنی جیت کو یادگار خیال کرتے ہوئے نہایت مسرت کا اظہار کیا۔

سیرینا ولیمز کی بہن اور سابقہ عالمی نمبر ایک وینس ولیمز بھی بدھ ہی کے روز دوسرے راؤنڈ کا میچ ہار کر سنگلر چیمپیئن شپ کی دوڑ سے باہر ہو گئی ہیں۔ امریکی کھلاڑی وینس ولیمز کو یورپی ملک سلوواکیہ کی انا شمیڈلووا نے تین سیٹ کے میچ میں ہرایا۔ میچ کے پہلے سیٹ میں امریکی کھلاڑی نے سلوواکین ٹینس کھلاڑی کو بڑی آسانی سے مات دے دی لیکن دوسرے سیٹ میں وہ اپنا رِدھم برقرار رکھنے سے قاصر رہیں اور ہار گئیں۔ تیسرے سیٹ میں بھی وینس ولیمز نے قدرے نروس کھیل کا مظاہرہ کیا اور ایک غیر معروف کھلاڑی سے ہار کر ویمن چیمپیئن شپ سے باہر ہو گئی۔ دوسرے راؤنڈ میں اٹلی سے تعلق رکھنے والی عالمی نمبر بارہ فلاوایا پینیٹا کو بھی شکست کے بعد ٹورنامنٹ سے باہر ہونا پڑا ہے۔