فرانسیسی صدر کا اسرائیل پر پابندیاں عائد کرنے کا عندیہ

فرانسیسی صدر ایمانوئل ماکروں نے کہا ہے کہ اگر اسرائیل نے غزہ میں انسانی ہمدردی کی بنیادوں پر امداد کی ترسیل میں رکاوٹ ڈالنے کا سلسلہ جاری رکھا تو فرانس اپنی پالیسی سخت کر سکتا ہے، جس میں ممکنہ طور پر اسرائیلی آبادکاروں پر لگائی جانے والی پابندیاں بھی شامل ہو سکتی ہیں۔

سنگاپور کے دورے کے موقع پر آج جمعہ 30 مئی کو وزیر اعظم لارنس وونگ کے ہمراہ ایک مشترکہ پریس کانفرنس سے خطاب کرتے ہوئے ماکروں نے کہا، ''انسانی ہمدردی کے تحت مہیا کی جانے والی امداد کی ناکہ بندی نے زمینی حالات کو ناقابل برداشت بنا دیا ہے۔ اگر آئندہ چند گھنٹوں یا دنوں میں انسانی ہمدردی کی بنیادوں پر کوئی مثبت ردعمل نہ آیا، تو ہمیں اجتماعی طور پر اپنی پالیسی سخت کرنا پڑے گی۔‘‘

انہوں نے مزید کہا کہ وہ اب بھی امید رکھتے ہیں کہ اسرائیلی حکومت اپنے رویے میں تبدیلی لائے گی اور انسانی ہمدردی کی بنیادوں پر امداد کی فراہمی ممکن بنائی جائے گی۔ اسرائیلی وزیر اعظم بینجمن نیتن یاہو کی حکومت پر عالمی دباؤ میں اضافہ ہو رہا ہے، جسے غزہ میں جاری صورتحال کی وجہ سے شدید تنقید کا سامنا ہے۔

ماکروں اس وقت سرکاری دورے پر سنگاپور میں موجود ہیں، جہاں وہ 30 مئی سے یکم جون تک جاری رہنے والے ایشیا کے اہم ترین سکیورٹی فورم ''شنگریلا ڈائیلاگ‘‘میں کلیدی خطاب بھی کریں گے۔

جنگ بندی کی کوششیں ہنوز ناکام

ادھر غزہ میں جنگ بندی کی کوششیں حماس اور اسرائیل کے درمیان گہرے اختلافات کے باعث اب تک ناکام ہیں۔ اسرائیل نے بڑھتے ہوئے عالمی دباؤ کے تحت 11 ہفتے طویل امدادی ناکہ بندی جزوی طور پر ختم کی ہے، اور اقوام متحدہ یا امریکا کے تعاون سے قائم ''غزہ ہیومینیٹیرین فاؤنڈیشن‘‘ کے ذریعے وہاں صرف محدود امداد پہنچانے ہی کی اجازت دی ہے۔

فرانسیسی صدر نے ایک بار پھر اس تنازعے کے سیاسی اور دو ریاستی حل کی حمایت کا اعادہ کیا۔ سفارتی ذرائع کے مطابق ماکروں فلسطینی ریاست کو تسلیم کرنے کے بارے میں سنجیدگی سے غور کر رہے ہیں، جو نہ صرف اسرائیل کو ناراض کر سکتا ہے بلکہ مغربی دنیا میں پالیسی کی تقسیم کو مزید گہرا بھی کر سکتا ہے۔

فرانس اور سعودی عرب رواں سال 17 سے 20 جون تک اقوام متحدہ کے اشتراک سے ایک بین الاقوامی کانفرنس کی میزبانی کر رہے ہیں، جس کا مقصد فلسطینی ریاست کے لیے روڈ میپ طے کرنا اور اسرائیل کی سلامتی کو یقینی بنانا ہے۔

واضح رہے کہ اسرائیل نے سات اکتوبر 2023 کو حماس کے جنوبی اسرائیل پر دہشت گردانہ حملے میں 1,200 افراد کی  ہلاکت اور 251 کے یرغمال بنائے جانے کے بعد غزہ میں بھرپور فوجی کارروائی  کا آغاز کیا تھا، جس میں حماس کے زیر انتظام غزہ کی وزارت صحت کے مطابق اب تک 54,000 سے زائد فلسطینی مارے جا چکے ہیں، جو دونوں فریقون کے درمیان کسی بھی سابقہ لڑائی میں مارے جانے والے افراد کے مقابلے میں بہت زیادہ تعداد ہے۔

شکور رحیم، روئٹرز، اے ایف پی کے ساتھ

ادارت: افسر اعوان، مقبول ملک