فرانس کی بارٹولی نے ومبلڈن کا میدان مار لیا

ومبلڈن میں خواتین کے ٹائٹل کے لیے ماریون بارٹولی اور زبیینے لیزیکی ہفتے کو میدان میں اتریں۔ فرانسیسی کھلاڑی نے یہ مقابلہ چھ ایک، چھ چار سے جیت لیا۔ خبررساں ادارے روئٹرز کے مطابق لیزیکی اس مقابلے میں خاصی نروس دکھائی دیں جس کا بارٹولی نے بھرپور فائدہ اٹھایا اور بالآخر انہیں مات دے دی۔

اس جیت کے بعد بارٹولی کا کہنا تھا: ’’جب میں چھوٹی تھی تو میں نے اس لمحے کا خواب دیکھا تھا۔‘‘

ومبلڈن میں مردوں کا فائنل اتوار کو ہوگا۔ اس میچ میں عالمی نمبر ایک نوواک جوکووچ عالمی نمبر دو کھلاڑی اینڈی مرے کے مدِ مقابل ہوں گے۔

مرے ومبلڈن میں فاتح رہے تو 1936ء کے بعد یہ ٹورنامنٹ جیتنے والے وہ پہلے برطانوی کھلاڑی ہوں گے۔ اینڈی مرے گزشتہ برس ومبلڈن کے فائنل میں پہنچ گئے تھے اور یوں گزشتہ سات دہائیوں سے زائد عرصے میں اس ٹورنامنٹ میں مردوں کے فائنل تک رسائی پانے والے وہ پہلے برطانوی کھلاڑی بنے۔ فائنل میں ان کا سامنا راجر فیڈرر سے ہوا تھا تاہم وہ یہ میچ جیتنے میں ناکام رہے۔

اس سے قبل ومبلڈن کے فائنل تک رسائی پانے والے برطانوی کھلاڑی بنی آسٹن تھے، جنہیں یہ کامیابی 1938ء میں ملی تھی۔ برطانوی کھلاڑی اب تک اس ٹورنامنٹ کے سیمی فائنلز میں 11 مرتبہ شکست کا سامنا کر چکے ہیں۔

برطانیہ نے ومبلڈن کا ٹائٹل آخری مرتبہ 1936ء میں جیتا تھا۔ اس وقت برطانوی کھلاڑی فریڈ پیری فائنل میں فاتح رہے تھے۔