فان گوخ کی ایک نایاب پینٹنگ کی رونمائی

ایمسٹرڈیم کے ’فان گوخ میوزیم‘ نے اس نایاب فن پارے کو پیر کے روز پہلی بار نمائش کے لیے پیش کیا۔ انیسویں صدی کے اس عظیم مصور کی پینٹنگ کے نیچے میوزیم انتظامیہ کی جانب سے تحریرکیا گیا یہ جملہ وہاں موجود سبھی لوگوں کے جذبات کی حقیقی ترجمانی کر رہا تھا، ’’زندگی کا ایک ایسا تجربہ، جوصرف ایک بار ہی حاصل ہوتا ہے۔‘‘

تصویر کو متعارف کروائے جانے کے موقع پر عجائب گھر کے ڈائریکٹر ایکسل راجرز کا کہنا تھا، ’’ یہ ایک ایسا منفرد تجربہ ہے، جو اس سے پہلے فان گوخ میوزیم کی تاریخ میں دیکھنے میں نہیں آیا۔ ‘‘

ولیم فان گوخ کے عظیم فنکار ہونے کی گواہی دیتی اس بڑی آئل پینٹنگ میں ’مونت مایور‘ پر غروب آفتاب کے قدرتی نظارے کی انتہائی خوبصورت انداز میں منظر کشی کی گئی ہے۔

شاہ بلوط کے درختوں کے رومانوی احساس سے سجی یہ تصویر چار سال قبل ایک نجی ملکیت سے اس نمائش گاہ میں لائی گئی تھی۔ وہاں محققین ایک طویل عرصے تک یہ جاننے کے لیے سرگرم عمل رہے کہ آیا یہ تصویر اصل ہے۔

گوخ کی جانب سے 4 جولائی سن 1888 کو تحریر کیے گئے ایک خط اور اس پینٹنگ کا مختلف زاویوں سے باریک بینی کے ساتھ جائزہ لینے کے بعد یہ نتیجہ اخذ کیا گیا کہ یہ تصویر واقعی گوخ کی تخلیق ہے۔

یہ تصویر ایک طویل عرصے تک ناروے کے ایک شخص کے انتخاب کا حصہ رہی۔ انہوں نے یہ پینٹنگ سن 1908 میں خریدی تھی تاہم وہ یہی سمجھتے رہے کہ یہ پینٹگ ایک نقل ہے۔

اس تصویر پر تحقیق کرنے والوں میں شامل لوئیس فان تلبروخ کا کہنا تھا، ’’ یہ ایک ایسا تجربہ تھا جو زندگی میں کبھی کبھار ہی ہوتا ہے۔‘‘

تلبروخ کا اس تصویر کی حقیقت کے حوالے سے کہنا تھا، ’’ اس میں کوئی شک نہیں کہ یہ فان گوخ ہی کی ہے۔‘‘

ہالینڈ سے تعلق رکھنے والے فان گوخ کو انیسویں صدی کے معروف مصوروں میں شمار کیا جاتا ہے۔ وہ صرف 37 سال کی عمر میں موت کے منہ میں چلے گئے تھے۔

ان کی موت انتہائی نا گہانی تصور کی جاتی ہے۔ نوجوانی میں وہ اپنے ورثے میں بائیس سو آرٹ کے نمونے چھوڑ گئے تھے۔

گوخ کی یاد میں ایمسٹرڈیم میں قائم فان گوخ میوزیم میں اس عظیم مصور کے کام کی نمائش کے ساتھ ساتھ تحقیقی کام بھی جاری رہتا ہے، جس کا مقصد فن مصوری سے دلچسپی رکھنے والوں کو ان کے کام سے آگاہ کرنا ہے۔

فان گوخ نے مصوری کے خوبصورت شاہکار تخلیق کرنے کے ساتھ ساتھ 1872ء سے 1890ء کے عرصے میں 893 خطوط بھی تحریر کیے اور 83 خطوط ان کو لکھے گئے، جنہیں ہالینڈ میں چھ کتابوں کی صورت میں شائع کیا گیا ہے۔

فان گوخ کے یہ خطوط ایمسٹرڈیم میں قائم فان گوخ میوزیم میں ان کے مشہور فن پاروں کے ساتھ رکھے گئے ہیں۔