عام انتخابات کا انعقاد، پاکستانی اسٹاک ایکسچینج میں تیزی

نیوز ایجنسی روئٹرز کی رپورٹ کے مطابق پاکستان تحریک انصاف اب تک کے نتائج کے مطابق پاکستان کی قومی اسمبلی میں سب سے زیادہ نشستیں لینے میں کامیاب ہوئی ہے تاہم انتخابات کے نتائج کے اعلان میں تاخیر اور سیاسی حریفوں کی جانب سے دھاندلی کے الزامات کا سلسلہ جاری ہے۔

 پاکستان الیکشن کمیشن کے سربراہ بابر یعقوب نے آج میڈیا سے گفتگو کرتے ہوئے کہا ہے، ’’ الیکٹرونک رپورٹنگ سسٹم میں کچھ تیکنکی مسائل کی وجہ سے انتخابی نتائج میں  تاخیر ہوئی ہے اور اب سافٹ وئیر کے بغیر ہی نتائج مرتب کیے جا رہے ہیں۔‘‘

 پاکستانی انگریزی اخبار ڈان کی ویب سائٹ کے مطابق اب تک 47 فیصد نتائج کا اعلان کیا گیا ہے۔ ان نتائج کے مطابق پاکستان تحریک انصاف قومی اسمبلی کی 113، مسلم لیگ ن 64،  پاکستان پیپلز پارٹی 43، ایم کیو ایم پانچ  اور متحدہ مجلس عمل نو نشستوں پر کامیاب ہوئی ہے۔

دوسری جانب انتخابی نتائج کے بعد پاکستان کی اسٹاک ایکسچینج میں تیزی ریکارڈ کی گئی ہے۔ تجزیہ کاروں کے مطابق پاکستان کی اگلی حکومت کو اقتصادی چینلجز کا سامنا ہوگا اور کچھ اقتصادی ماہرین کے مطابق پاکستان کو انٹرنیشنل مانیٹری فنڈ کی مدد حاصل کرنا پڑے گی۔ پاکستان تحریک انصاف اس حوالے سے یہ کہہ چکی ہے کہ وہ چین سے مدد حاصل کرنے کو تیار ہوگی۔

آج صبح پاکستان کے 100 شیئر انڈیکس میں 1.9 فیصد اضافہ ریکارڈ کیا گیا۔  ’ٹاپ لائن سکیورٹیز‘ نامی مقامی بروکریج ہاؤس کے ڈائریکٹر ریسرچ  سعد ہاشمی نے روئٹرز کو بتایا،’’ عمران خان چھوٹے اتحادیوں کے ساتھ حکومت بنا سکتے ہیں اور زیادہ مخالفت کے بغیر ضروری اصلاحات کر سکتے ہیں۔‘‘

پاکستان میں ایسا دوسری مرتبہ ہوگا کہ ایک منتخب سیاسی جماعت  اپنی مدت پوری کر کے دوسری منتخب جماعت کو حکومتی ذمہ داریاں دے گی۔ پاکستان مسلم لیگ ن 2013 میں اکثریتی ووٹ حاصل کرنے میں کامیاب ہو گئی تھی۔ تاہم یہ جماعت سابق وزیر اعظم نواز شریف کی نااہلی کے بعد سے پاکستان کی فوج اور عدلیہ پر مسلم لیگ ن کو دیوار سے لگانے کے الزامات عائد کرتی رہی ہے۔ پاکستان مسلم لیگ ن کے مطابق ملک کی اسٹیبلشمنٹ پاکستان تحریک انصاف کو اقتدار دینا چاہتی ہے۔

عمران  خان نے اپنی انتخابی مہم کے دوران پاکستان کو ایک ’اسلامی فلاحی ریاست‘ بنانے اور مالی بدعنوانی کے خاتمے کا اعلان کیا تھا۔ اب یوں لگتا ہے کہ 208 ملین کی آبادی کے ملک پاکستان میں جہاں شرح خواندگی صرف 40 فیصد ہے، عمران خان اپنی حکومت بنانے میں کامیاب ہو جائیں گے۔

 

ب ج/ ص ح (روئٹرز)