سوزوکا گراں پری برطانوی ڈرائیور لیوئس ہیملٹن کے نام

مرسیڈیز کے ڈرائیور لیوئس ہیملٹن نے سوزوکا گراں پری جیت کرعالمی رینکنگ میں اپنی سبقت کو مزید مستحکم کر لیا ہے۔ یہ ان کی اس سیزن میں آٹھویں فتح تھی۔ اس طرح انہیں اپنے قریبی ترین حریف نیکو روزبرگ پر دس پوائنٹس کی برتری حاصل ہو گئی ہے۔ سوزوکا گراں پری میں ہیملٹن کے بعد اُن کی ہی ٹیم کے نیکو روزبرگ نے دوسری پوزیشن حاصل کی۔

اِس ریس میں ریڈ بل ٹیم کے سیباسیتان فیٹل اور ڈینیئل ریکارڈو تیسرے اور چوتھے نمبر پر رہے۔ اِس سیزن میں ایسا چوتھی مرتبہ ہوا کہ فیٹل ونرز پوڈیم تک پہنچے میں کامیاب ہوئے ہیں۔ اِس تناظر میں فیٹل نے کہا کہ ریس کے دوران اُنہیں گاڑی کے پہیے تبدیل کرنا پڑے، جس کی وجہ سے وہ اپنی پوزیشن برقرار نہ رکھ سکے۔

سوزوکا میں ہونے والی گراں پری ریس 53 راؤنڈز پر مشتمل تھی تاہم بارش کے باعث اِسے چھیالیس ویں راؤنڈ میں ہی ختم کرنا پڑا۔ اِس سے قبل ریس شروع ہونے کے دو لیپس بعد ہی سیفٹی کار ٹریک پر آ گئی تھی، جس کی وجہ سے ریس میں پندرہ منٹ کا وقفہ آ گیا تھا۔ پھر سیفٹی کار کے پیچھے سات لیپس کے بعد ریس دوبارہ باقاعدہ شروع ہوئی۔

اِس کے بعد 44 ویں راؤنڈ میں ایک حادثہ ہوا، جس کے دو لیپس بعد ریس کو مکمل طور پر روکنا پڑ گیا۔ یہ حادثہ زاؤبر ٹیم کے جرمن ڈرائیور آدریاں سوٹل کی وجہ سے ہوا۔ جس وقت سوٹل کی گاڑی کو ٹریک سے ہٹایا جا رہا تھا، اُس وقت ماروسیا ٹیم کے فرانسیسی ڈرائیور یول بیانکی کی گاڑی ریکوری ویہیکل سے ٹکرا گئی۔ بیانچی کو ہسپتال منتقل کرنے کے لیے ہیلی کاپٹر کو بلایا گیا تاہم خراب موسم کی وجہ سے وہ لینڈ نہیں کر سکا۔ اِس وجہ سے اُنہیں ایمبیولنس کے ذریعے ہی ہسپتال منتقل کیا گیا، جہاں اُن کی حالت خطرے میں بتائی جاتی ہے۔

اِس سلسلے میں سوٹل نے بتایا کہ ٹریک پر جمع ہونے والے پانی کے سبب وہ اپنی گاڑی پر کنٹرول نہیں رکھ سکے تھے۔’’ تاہم بعد میں جو حادثہ رونما ہوا، وہ میرے لیے ایک دھچکے سے کم نہیں ہے‘‘۔ اُن کے بقول وہ اِس بارے میں مزید کچھ نہیں کہنا چاہتے، بس دعا ہے کہ بیانکی جلد صحت پاب ہو جائے۔

جاپانی گراں پری کے فاتح ڈرائیور لیوئس ہیملٹن نے کہا کہ تمام افراد بیانکی کے لیے دعاگو ہیں۔ سیزن کی پندرہ ریسز مکمل ہونے کے بعد برطانوی ڈرائیور ہیملٹن مجموعی کارکردگی کے اعتبار سے پہلے نمبر پر ہیں اور اُن کے پوائنٹس کی تعداد 266 ہو گئی ہے۔ اُن کے بعد 256 پوائنٹس کے ساتھ مرسیڈیز ٹیم ہی کے نیکو روزبرگ ہیں، جن کا تعلق جرمنی سے ہے۔ تیسرے نمبر پر ریڈ بل ٹیم کے آسٹریلیا سے تعلق رکھنے والے ڈرائیور ڈینیئل ریکارڈو ہیں، جن کے 196پوائنٹس ہیں جبکہ ریڈ بل ٹیم ہی کے جرمن ڈرائیور سیباستیان فیٹل 136پوائنٹس کے ساتھ چوتھے نمبر پر ہیں۔

فارمولا ون کے اِس سیزن کی چار ریسیں ابھی باقی ہیں اور اِس سلسلے میں اگلا مقابلہ روسی شہر سوچی میں ہو گا۔ رشین گراں پری 10 سے 12اکتوبر تک منعقد ہو گی۔