سنگا پور گراں پری جرمن ڈرائیور فیٹل کے نام

فارمولا ون کار ریسنگ میں سنگاپور گراں پری کو دفاعی چیمپیئن سباستیان فیٹل نے جیت لیا ہے۔ رواں برس کی تیرہ ریسز کے مکمل ہونے پر جرمن ڈرائیور سباستیان فیٹل کے پوائنٹس کی تعداد 247 ہو گئی ہے۔ ان کا قریب ترین حریف 60 پوائنٹس کی دوری پر ہے۔ ڈرائیور چیمپیئن شپ کے پوائنٹس ٹیبل پر فیٹل کے بعد ہسپانوی ڈرائیور فرنانڈو آلانسو ہیں اور ان کے پوائنٹس کی تعداد 187 ہے۔ تیسری پوزیشن برطانوی ڈرائیور لوئیس ہملٹن کے پاس ہے اور اس کے پوائنٹس 151 ہیں۔ کِمی رائیکونن اور مارک ویبر چوتھی اور پانچویں پوزیشن پر ہیں۔

سنگا پور ریس جیتنے سے قبل سباستیان فیٹل کی الانسو پر سبقت 53 پوائنٹس کی تھی جو اب مزید سات پوائنٹس کے ساتھ 60 ہو گئی ہے۔ سنگاپور میں دوسری پوزیشن فرنانڈو الانسو کو حاصل ہوئی ہے۔ کِمی رائیکونن کو تیسرا مقام حاصل ہوا ہے۔ سنگا پور گراں پری میں مرسیڈیز گاڑیوں کی جوڑی نیکو روزبیرگ اور لوئیس ہملٹن کو چوتھی اور پانچویں پوزیشن حاصل ہوئی ہے۔ فارمولا ون سیزن کی تیرہویں ریس میں کامیابی حاصل کرنے کے بعد سباستیان فیٹل نے اپنی بھرپور مسرت کا اظہار کرتے ہوئے کہا کہ وہ سردست چیمپیئن شپ ٹیبل پر نگاہ نہیں رکھے ہوئے بلکہ وہ ریس سے لطف اندوز ہو رہے ہیں۔ سنگاپور گراں پری کے دوران آغاز سے لے کر اختتام تک فیٹل نے اپنی سبقت کو برقرار رکھا۔ وہ ہفتے کے روز پول پوزیشن جیتنے میں کامیاب رہے تھے۔

سنگا پور گراں پری کے دوران فراری موٹر گاڑی پر سوار ہسپانوی ڈرائیور فرنانڈو الانسو اور ریڈ بُل ٹیم کے رُکن مارک ویبر کو فارمولا اسپورٹس کے قواعد و ضوابط کے منافی فعل سرزد کرنے پر تادیبی سزا دینے کا فیصلہ کیا گیا ہے۔ رواں برس مارک ویبر کو تیسری مرتبہ فاؤل پلے کی وجہ سے سزا کا سامنا ہے۔ اگلے اتوار کی کوریائی گراں پری کے دوران ان کو ریس کا آغاز دسویں پوزیشن سے کرنا ہو گا۔ الانسو کو وارننگ دی گئی ہے۔

فارمولا ون کار ریسنگ کے رواں برس کے سیزن میں اتوار کے روز سنگاپور میں تیرہویں ریس مکمل ہو ئی ہے۔ ابھی چھ مزید ریسز باقی ہیں۔ اگلی دو فارمولا ریسنگ مقابلے مشرقی بعید کے ممالک کوریا اور جاپان میں ہوں گے۔ چودہویں ریس اگلے اتوار کے روز کوریا میں ہے۔کوریا اور جاپان کے بعد بھارت کی باری ہے جہاں نئی دہلی کے قریب واقع سرکٹ میں ریس اکتوبر میں منعقد کی جائے گی۔ نئی دہلی کے بعد فارمولا ون ریس کا اگلا پڑاؤ پھر ابوظہبی میں ہو گا اور اُس کے بعد آخری دو ریسوں کے لیے امریکا اور برازیل کے آسٹن اور ساؤ پاؤلو شہر میزبان ہوں گے۔