روم ماسٹرز میں ندال اور سیرینا کی جیت

عالمی نمبر پانچ رفائیل ندال نے روم کے کلے کورٹ پر راجر فیڈرر کو چھ ایک اور چھ تین کے اسکور سے شکست دی۔ ندال انجری کے سبب سات ماہ تک ٹینس سے دور رہے تھے اور فروری میں لوٹنے کے بعد سے کامیابیاں سمیٹ رہے ہیں۔ ندال کے حریف فیڈرر نے بھی روم میں شکست کے بعد تسلیم کیا کہ ندال ہی اب فرنچ اوپن جیتنے کے لیے فیورٹ ہے۔

ندال کا البتہ کہنا تھا کہ وہ فی الحال اس بابت بہت زیادہ چرچا نہیں کرنا چاہتے۔ فیڈرر کو واضح مارجن سے ہرانے سے متعلق ندال نے کہا کہ ان کے سوئس حریف نے معمول سے زیادہ غلطیاں کیں جو شکست کا سبب بنیں۔ انہوں نے یہ بھی مانا کہ گزشتہ 38 مقابلوں میں سے 36 میں جیت کے شاندار ریکارڈ کا انہوں نے خواب بھی نہیں دیکھا تھا۔ ’’اگر آپ مجھ سے چار یا پانچ ماہ قبل اس بارے میں پوچھتے تو میں کہتا کہ آپ پاگل ہیں۔‘‘

روم ماسٹرز کا فائنل فیڈرر کے لیے سال رواں کا پہلا فائنل تھا جبکہ ندال کا یہ آٹھواں فائنل مقابلہ تھا، جن میں سے وہ چھ جیت چکے ہیں۔ خود ندال اور فیڈرر ایک دوسرے کے خلاف 30 بار آمنے سامنے آچکے ہیں اور یہ بازی 10 کے مقابلے پر 20 فتوحات سے ندال کے حق میں ہے۔ ندال نے کلے پر فیڈرر کو مجموعی طور پر 13 مرتبہ مات دے رکھی ہے۔

روم ماسٹرز کے خواتین مقابلوں کا فائنل سیرینا ولیمز کے نام رہا، جنہوں نے وکٹوریہ آذارینکا کو شکست دی۔ یہ رواں سیزن میں ان کی چوتھی اور مجموعی طور پر کیریئر کی 51 ویں جیت ہے۔ فائنل مقابلے میں آذارینکا کے خلاف ان کا اسکور چھ ایک اور چھ تین رہا۔ جیت کے بعد ولیمز نے کہا کہ وہ گرینڈ سلیم کے کئی مقابلے جیت چکی ہیں اور اب فرنچ اوپن سے متعلق ان پر کوئی ذہنی دباؤ نہیں ہے۔ فرنچ اوپن رواں ماہ کے آخری ہفتے میں کھیلا جائے گا۔

(sks/ ia (AFP