دورہ پاکستان بنگلہ دیش کے اپنے مفاد میں ہے، ذکاء اشرف

لاہور میں ریڈیو ڈوئچے ویلے سے گفتگو کرتے ہوئے ذکاء اشرف کا کہنا تھا کہ پاکستان سُپر لیگ ٹیکس فری ہوگی اور پی ایس ایل میں سرمایہ کاری کرنے والوں کے لیے منافع کمانے کا یہ سنہری موقع ہے۔ دو سال تک پی ایس ایل کی ویلیو دوگنا ہو جائے گی اور ٹیموں کے مالکان کی آمدن پر بھی کوئی ٹیکس نہیں ہوگا۔

پاکستانی کھلاڑیوں کی بنگلہ دیش پریمیر لیگ ﴿ بی پی ایل﴾ میں شرکت کے حوالے سے ذکاء اشرف کاکہنا تھا، ’’ ہم نے اس معاملے کو ان کی ٹیم کے دورے سے کبھی مشروط نہیں کیا۔ بنگلہ دیش کرکٹ بورڈ اپنی ٹیم کو پاکستان بھیجنا چاہتا ہے مگر وہ حکومت پنجاب کی وجہ سے خوفزدہ ہیں۔ گز شتہ برس حکومت پنجاب نے انہیں یہ کہہ کر خوفزدہ کر دیا تھا کہ ہم سکیورٹی فراہم نہیں کر سکتے، اس لیے ان کے اب بھی تحفظات ہیں‘‘۔

ذکاء اشرف کے بقول، ’’بنگلہ دیش کا دورہ پاکستان سے انکار پاکستانی سُپر لیگ کو متاثر نہیں کر سکتا بلکہ ہم ان پر اثر انداز ہو سکتے ہیں۔ پاکستان نے بنگلہ دیش کرکٹ کے لیے ہمیشہ اچھا سوچاہے اور اب بھی ہم ان کے ساتھ مل کر چلنا چاہتے ہیں اور اسی میں ہی ان کا بھی مفاد ہے۔ ہمارے ساتھ مل کر چلنے میں بنگلہ دیش کی ناصرف کرکٹ بہتر ہوگی بلکہ انہیں اپنی لیگ کے ساتھ اور بھی مالی فوائد مل سکتے ہیں۔‘‘

ذکاء اشرف نے، جن کا تعلق حکمران جماعت پاکستان پیپلز پارٹی سے ہے، دعویٰ کیا کہ بھارت کی ٹیم پاکستان آناچاہتی ہے اور انہیں صرف سکیورٹی کی ضمانت چاہیے، ’’اگر ایک دو ٹیمیں پاکستان آجائیں تو راستے کھل جائیں گے۔ میں نے دنیا کی کئی دوسری ٹیموں سے بھی پاکستان آنے کی بات کی ہے۔ وہ سب قطار میں لگی ہوئی ہیں مگر وہ سب انتظار کر رہے ہیں کہ پہل کوئی دوسرا کرے۔‘‘

ذکاء اشرف کے مطابق ٹوئنٹی ٹوئنٹی پاکستان سُپر لیگ ملک میں بین الاقوامی کرکٹ کی بحالی میں کلیدی کردار ادا کرے گی۔

دوسری جانب دوسری جانب بین الاقوامی کرکٹ کونسل نے پاکستان میں عالمی کرکٹ کی بحالی کے لیے پھر کسی قسم کی یقین دہانی کروانے سے انکار کر دیا ہے۔ پاکستان کے دورے پر آنیوالے آئی سی سی کے چیف ایگزیکٹو ڈیو رچرڈسن کا کہنا تھا کہ غیر ملکی ٹیموں کی حفاظت اور انہیں سلامتی کی یقین دہانی کرانا پی سی بی کی ذمہ داری ہے۔ تاہم رچرڈسن نے پاک بھارت مقابلوں کی بحالی اور پاکستان سُپر لیگ کے اجراء کو ملک میں انٹر نیشنل کرکٹ کی بحالی کی جانب اہم پیش رفت قرار دیا۔

واضح رہے کہ پاکستان نے مارچ کے آخری ہفتے میں لاہور اور کراچی سمیت پانچ شہروں کی فرنچائز ٹیموں کے درمیان ٹوئنٹی ٹوئنٹی لیگ کرانے کا اعلان کیا ہے، جس میں شرکت کے لیے نامور غیر ملکی کرکٹرز کو قائل کیا جا رہا ہے اور اس مقصد کے لیے پی سی بی نے آئی سی سی کے سابق چیف ایگزیکٹو ہارون لارگاٹ کی خدمات بطور مشیر حاصل کی ہیں۔

رپورٹ: طارق سعید، لاہور

ادارت: امتیاز احمد