دو ہزار بارہ: پاکستانی کھیلوں میں خوش کن پیش رفت کا سال

 متحدہ عرب امارات میں پاکستان نے انگلینڈ کوپہلی بار ٹیسٹ سیریز میں وائٹ واش کیا مگر جون میں گال ٹیسٹ کی ناکامی سری لنکا میں پاکستان کے مسلسل دوسری ٹیسٹ سیریز ہارنے کا بھی سبب بن گئی۔ مارچ میں پاکستان نے فائنل میں میزبان بنگلہ دیش کو دو رنز سے ہرا کر بارہ برس بعد ایشیا کپ کا ٹائٹل جیتا البتہ اسی پاکستانی ٹیم نے خلیج میں انگلینڈ اور آسٹریلیا کے سامنے ایک روزہ سیریز میں ہتھیار ڈال دیے۔

مئی میں سری لنکا میں بھی محدود اوورزکے میچوں میں اسے تین دو سے شکست ہوئی ۔ ٹوئنٹی فارمیٹ میں اگست میں پاکستان نے آسٹریلیا کو ہرا دیا تھا مگر گرین شرٹس کی عالمی کپ میں دوڑ کولمبو کے سیمی فائنل میں ہی ختم ہوگئی۔ بولنگ میں یہ سعید اجمل کا سال رہا، جنہوں نے تینوں فارمیٹس میں پچانوے وکٹیں لےکر دنیا میں سب کو پیچھے چھوڑ دیا۔ اظہر علی پانچ سو اکیاون رنز بنا کر ٹیسٹ اور کپتان مصباح الحق چار سو تیروانے رنز کے ساتھ ون ڈے کرکٹ میں پاکستان کے سب سے کامیاب بیٹسمین ٹھہرے۔

پاکستان کرکٹ میں یہ تبدیلیوں کا بھی سال تھا۔ ٹیم کی ٹیسٹ رینکنگ چھ سے بہتر ہو کر چار ہوئی، آسٹریلوی ڈیو وٹمور کو محسن خان کی جگہ ٹیم کا نیا کوچ اور محمد حفیظ کو مصباح الحق کی جگہ نیا ٹوئنٹی ٹوئنٹی کپتان مقرر کیا گیا۔

سلمان بٹ، محمد عامر اور محمد آصف تو برطانوی جیلوں سے رہا ہوگئے  مگراس سال بھی پاکستان کرکٹ اپنے سینے کو بدنامی کے داغ سے نہ بچا پائی۔ دانش کنیریا  کوبرطانوی کاؤنٹی کرکٹ میں میچ فکسنگ کی پاداش میں تاحیات اور عبدالرحمان کو ممنوعہ ادویات کے استعمال پر بارہ ہفتے پابندی کا سامنا کرنا پڑا۔

دوسری جانب پاکستان کرکٹ بورڈ کی جانب سے بین الاقوامی کرکٹ کی ملک میں بحال کے تمام دعوے بھی دھرے کے دھرے رہ گئے۔

ہاکی میں دو ہزار بارہ پاکستان کے لیے وقار کی بحالی کی جانب پیش قدمی کا عرصہ رہا۔ لندن اولمپکس اور اذالان شاہ کپ میں پاکستان کو ساتویں پوزیشن پر اکتفا کرنا پڑا۔ دورہء یورپ میں بھی سبکی ہوئی البتہ دوحہ ایشیائی چمپئنز ٹرافی میں سرخرو ہونے سے پہلے میلبورن ورلڈ چمپینز ٹرافی میں وکٹری اسٹینڈ پر آنا گرین شرٹس کے لیے اس سال کا سب سے بڑا کارنامہ تھا۔ پاکستان ہاکی ٹیم نے بارہ ماہ میں اٹھائیس میچ کھیل کر بارہ کامیابیاں سمیٹیں جبکہ تیرہ میں اسے شکست ہوئی اور تین میچ برابر رہے۔

وقاص شریف نے چودہ اور جسیم خان نے تیرہ گول کے ساتھ اپنی دھاک بٹھائی۔ پاکستان ہاکی ٹیم کے کپتان محمد عمران دو ہزار بارہ کی کامیابیوں کی بابت کہتے ہیں، ’’یہ ہمارے لیے اچھا سال تھا ہم ناکامیوں کے حصار  سے باہر۔ ان کامیابیوں میں انتظامیہ اور کھلاڑیوں کی اچھی نیت کا عمل دخل تھا۔‘‘

ٹینس اسٹار اعصام الحق نے جن کی رواں برس اپنے اہلیہ سے علیحدگی ہوئی دو ہزار بارہ میں دو اے ٹی پی ٹائٹل جیتے اور دو گرینڈ سلیم کے سیمی فائنلز میں بھی پہنچ کے دم لیا۔

تحریر: طارق سعید

ادارت: عاطف توقیر