خلیجی عرب ریاستوں میں کہیں عید، کہیں آخری روزہ

سعودی عرب اور کچھ دیگر خلیجی عرب ریاستیں تو آج تیس مارچ بروز اتوار عید الفطر کا اسلامی تہوار منا رہی ہیں لیکن مشرق وسطیٰ کے دیگر ممالک کل یعنی پیر تک ایسا نہیں کریں گے۔ سعودی رائل کورٹ نے ہفتے کی رات سرکاری میڈیا کے ذریعے جاری کیے گئے ایک بیان میں کہا، ''سپریم کورٹ نے فیصلہ کیا ہے کہ کل بروز اتوار 30 مارچ 2025 کو عید الفطر کا پہلا دن ہے۔‘‘

خیال رہے کہ اسلامی قمری کیلنڈر کے مطابق مطابق عید کے دن کا تعین رمضان کے اختتام پر چاند کے نظر آنے پر کیا جاتا ہے۔ متحدہ عرب امارات اور قطر نے بھی کل رات ہی اتوار کے دن عید الفطر کی چھٹی کا پہلا دن ہونے کا اعلان کر دیا تھا۔

لیکن ہمسایہ ممالک عمان اوراردن کے ساتھ ساتھ شیعہ اکثریتی آبادی والے ایران نے کہا کہ عید الفطر کا تہوار پیر تک شروع نہیں ہو گا کیونکہ شوال کا چاند نظر آنا باقی ہے۔ مصر اور دیگر شمالی افریقی ممالک نے بھی اسی کی پیروی کی۔ مسلمانوں کے لیے مقدس ماہ رمضان میں لوگ روایتی طور پر خاندان اور دوستوں کے ساتھ شام کو افطار کرنے کے لیے جمع ہوتے ہیں۔ سعودی عرب کے شہر مکہ میں خانہ کعبہ اور مدینہ میں مسجد نبوی میں بڑے پیمانے پر اجتماعی افطاری کا بندوبست کیا جاتا رہا۔

تاہم رواں برس  اسرائیل کے غزہ پر جاری حملوں کی وجہ سے پوری اسلامی دنیا میں ماہ رمضان اور عید کے تہوار کی خوشیاں کچھ ماند دکھائی دیتی ہیں۔ فلسطینی عسکریت پسند تنظیم حماس کے سات اکتوبر 2023 کو اسرائیل پر دہشت گردانہ حملے میں ساڑھے بارہ سو سے زائد افراد کی ہلاکت کے بعد اسرائیل کی جانب سے شروع کی گئی جوابی کارروائی اب تک جاری ہے۔  حماس کے زیر انتظام غزہ کی وزارت صحت کے مطابق اس جنگ میں اسرائیلی  فوجی کارروائیوں میں اب تک دسیوں ہزار فلسطینی ہلاک ہو چکے ہیں۔

ش ر / م م (اے ایف پی، اے پی)