حزب اللہ کو غیر مسلح کرنے کا منصوبہ، قطر اور سعودی عرب تیار

امریکی صدر ڈونلڈ ٹرمپ کے مشرق وسطیٰ کے لیے خصوصی ایلچی ٹام بیریک کے مطابق سعودی عرب اور قطر جنوبی لبنان میں اسرائیل کی سرحد کے قریب ایک اقتصادی زون میں سرمایہ کاری کے لیے تیار ہیں۔ ہتھیار ڈالنے کی صورت میں یہ زون حزب اللہ کے جنگجوؤں اور ان کے حامیوں کے لیے روزگار کے مواقع پیدا کرے گا۔

لبنانی حکومت کا فیصلہ

بیریک نے یہ بیان بیروت میں اسرائیل اور شام کے دوروں کے بعد دیا، جہاں انہوں نے لبنانی حکومت کے رواں ماہ کے فیصلے پر تبادلہ خیال کیا، جس کے تحت حزب اللہ کو سال کے آخر تک غیر مسلح کرنے کا اعلان کیا گیا ہے۔ تاہم حزب اللہ کے سربراہ نے اس منصوبے کو مسترد کرتے ہوئے ہتھیار بہ پھینکنے کا عزم ظاہر کیا ہے۔

 پیر کو اسرائیلی وزیراعظم بینجمن نیتن یاہو نے کہا کہ لبنانی حکومت کے اس ''اہم فیصلے‘‘ کے بعد اسرائیلی فوجیں جنوبی لبنان کے زیر قبضہ علاقوں سے انخلا شروع کر سکتی ہیں۔

لبنانی فوج کا منصوبہ 

امریکہ کی حمایت یافتہ لبنانی فوج حزب اللہ کو غیر مسلح کرنے کے لیے ایک منصوبہ تیار کر رہی ہے، جو اگست کے آخر تک مکمل ہو جائے گا۔ توقع ہے کہ حکومت اس منصوبے کے بارے میں دو ستمبر کو ہونے والے اجلاس میں بحث کرے گی اور اس کی منظوری دے دے گی۔

خلیجی ممالک کی سرمایہ کاری 

لبنانی صدر جوزف عون سے ملاقات کے بعد بیریک نے صحافیوں سے کہا، ''ہمیں نظام میں سرمایہ لانا ہو گا اور یہ سرمایہ خلیجی ممالک سے آئے گا۔ قطر اور سعودی عرب شراکت دار ہیں اور وہ جنوبی لبنان کے لیے یہ سرمایہ کاری کرنے کو تیار ہیں۔‘‘

 انہوں نے مزید کہا، ''ایران 40 ہزار افراد کو لڑائی کے لیے فنڈز فراہم کر رہا ہے۔ ہم ان سے ہتھیار چھین کر یہ نہیں کہہ سکتے کہ 'زیتون کے درخت لگاؤ، گڈ لک۔‘ ہمیں ان کی مدد کرنا ہو گی۔‘‘ بیریک کا اشارہ تہران کی جانب سے 1980 کی دہائی سے حزب اللہ کے جنگجوؤں کو دی جانے والی مالی امداد کی طرف تھا۔

امریکی کردار اور اقوام متحدہ 

جب بیریک سے پوچھا گیا کہ امریکہ حزب اللہ کے معاملے پر براہ راست ایران سے بات چیت کیوں نہیں کرتا بلکہ اسرائیل اور شام کا رخ کرتا ہے، تو انہوں نے کہا،''آپ کو لگتا ہے کہ یہ نہیں ہو رہا؟ الوداع۔‘‘

 اس کے بعد انہوں نے پریس کانفرنس ختم کر دی اور کمرے سے باہر چلے گئے۔ اقوام متحدہ کی امن فوج (یو این آئی ایف آئی ایل) کے بارے میں، جو 1978 سے جنوبی لبنان میں تعینات ہے، بیریک نے کہا کہ امریکہ اس کی بجائے لبنانی فوج کو فنڈ دینا پسند کرے گا۔ انہوں نے بتایا کہ امریکہ اقوام متحدہ میں ہونے والی ووٹنگ میں امن فوج کے مینڈیٹ کی صرف ایک سال کے لیے توسیع کی حمایت کرے گا۔

لبنانی اسرائیلی تنازعہ

اسرائیل اور حزب اللہ کے درمیان کم شدت کا تنازعہ سات اکتوبر 2023 کو حماس کے اسرائیل پر حملے کے ایک دن بعد شروع ہوا، جب حزب اللہ نے اپنے فلسطینی اتحادی کی حمایت میں سرحد پار سے راکٹ داغنا شروع کیے۔ یہ تنازع ستمبر 2024 میں جنگ کی شکل اختیار کر گیا، جس کے نتیجے میں ورلڈ بینک کے مطابق لبنان میں 4000 سے زائد افراد ہلاک اور 11 ارب ڈالر کی تباہی ہوئی۔

 نومبر میں امریکی ثالثی سے جنگ بندی ہوئی، جس کے بعد حزب اللہ نے سرحدی علاقوں میں اپنی موجودگی ختم کرنے کا دعویٰ کیا۔ تاہم اسرائیل کی جانب سے تقریباً روزانہ فضائی حملے جاری ہیں، جن میں حزب اللہ کے درجنوں ارکان ہلاک ہو چکے ہیں۔

ایمنسٹی انٹرنیشنل کی رپورٹ اور اسرائیل پر الزام 

ایمنسٹی انٹرنیشنل کی منگل کو جاری کردہ ایک رپورٹ کے مطابق اکتوبر 2024 سے جنوری 2025 تک جنوبی لبنان میں 10 ہزار سے زائد عمارات کو ''شدید نقصان پہنچا یا وہ مکمل تباہ‘‘ ہوئیں۔ رپورٹ میں الزام لگایا گیا ہے کہ اسرائیلی فوج نے جنگ بندی کے بعد زیر قبضہ علاقوں میں ''دستی دھماکا خیز مواد اور بلڈوزرز‘‘ سے شہری املاک کو تباہ کیا، جو عالمی قانون کی خلاف ورزی ہو سکتی ہے، کیونکہ اس وقت ''فوجی طاقت کی ضرورت‘‘ موجود نہیں تھی۔ اسرائیلی فوجیں جنگ بندی کے باوجود سرحدی علاقوں میں موجود رہیں اور اب بھی پانچ اسٹریٹجک مقامات پر قبضہ رکھتی ہیں۔

ادارت: عاطف توقیر، کشور مصطفیٰ