جرمن کھلاڑی لیزیکی ومبلڈن کے سیمی فائنل میں

معتبر ترین گرینڈ سلام ٹورنامنٹ ومبلڈن کی پانچ مرتبہ کی چیمپئن سیرینا ولیمز کو پیر کے دن حیرت انگیز طور پر شکست دینے کے بعد 23 سالہ جرمن کھلاڑی زابینے لیزیکی نے منگل کے دن بھی عمدہ کارکردگی کا مظاہرہ کیا۔ کوارٹر فائنل میچ میں انہوں نے اسٹونیا کی کایا کاناپی کو چھ تین اور چھ تین سے ہرا کر اپنے مداحوں کے دل جیت لیے۔

میچ کے بعد عالمی نمبر 23 لیزیکی نے کہا، ’’ گزشتہ روز ایک انتہائی اچھا دن تھا لیکن مجھے یہ یقینی بنانا تھا کہ میں پر سکون رہوں اور آج کے دن کے لیے تیار رہوں۔‘‘ گزشتہ روز لیزیکی نے سیرینا ولیمز کو ہرایا تھا۔ ومبلڈن ٹورنامنٹ میں دوسری مرتبہ سیمی فائنل میں رسائی حاصل کرنے والی لیزیکی نے مزید کہا، ’’ یہ ایک ایسا کھیل ہے، جس سے مجھے بے حد لگاؤ ہے۔ میں ہر میچ میں کامیابی حاصل کرنا چاہتی ہوں۔‘‘ ان کا کہنا تھا کہ وہ سیمی فائنل معرکے کے لیے تیار ہیں۔

2011ء میں ومبلڈن خواتین کے سنگلز مقابلوں کے سیمی فائنل میں ماریا شارا پووا سے مات کھانے والی لیزیکی اس مرتبہ سیمی فائنل میں پولینڈ سے تعلق رکھنے والی عالمی نمبر چار اگنیئشکا راڈوانسکا کے مد مقابل ہوں گی۔ گزشتہ برس کی رنر اپ 24 سالہ راڈوانسکا نے چینی کھلاڑی لی نا کو سات چھ، چار چھ اور چھ دو سے ہرا کر سیمی فائنل میں جگہ بنائی ہے۔

تیسرے راؤنڈ کے ایک اور دلچسپ مقابلے میں بیلجیم سے تعلق رکھنے والی عالمی نمبر 20 کرسٹین فلپکنز نے 2011ء کی چیمپئن پیٹرا کویٹووا کو ہرا کر شائقین کو پریشان کر دیا۔ ستائیس سالہ فلپکنز نے کویٹووا کو چار چھ، چھ تین اور چھ چار سے شکست دی۔ وہ پہلی مرتبہ ومبلڈن کا سیمی فائنل کھیلنے کا اعزاز حاصل کریں گی۔

جیت کے بعد فلپکنز نے کہا، ’’یہ حیرت انگیز ہے۔ کسی گرینڈ سلام ٹورنامنٹ کے سیمی فائنل تک پہنچنا، میرے لیے خواب تھا، جو اب پورا ہو گیا ہے۔‘‘ پیٹرا کویٹووا کی شکست کا مطلب ہے کہ اب ومبلڈن کا ٹائٹل کسی ایسی کھلاڑی کا ملے گا، جو ابھی تک اس اعزاز سے محروم ہے۔

کرسٹین فلپکنز سیمی فائنل میں فرانسیسی کھلاڑی ماریون بارتیلی کے خلاف میدان میں اتریں گی۔ عالمی نمبر 15 بارتیلی نے کوارٹر فائنل مقابلے میں امریکی کھلاڑی سلونے اسٹیفنز کو چھ چار اور سات پانچ سے ہرایا ہے۔