جرمن کپ، بائرن میونخ فائنل میں

بدھ کے روز ہونے والے میچ میں بائرن میونخ کی جانب سے ڈیوڈ الابا، فرانک ریبری، فِلِپ لاہم اور ٹونی کروز نے پنیلٹی ککس پر گول کیے جبکہ گول کیپر مانویل نوئیر نے مؤنشن گلاڈباخ کے ہوارڈ نورڈٹفیٹ اور کلینچ وکٹوری کی جانب سے لگائی ہوئی ککس روکیں۔ مؤنشن گلاڈباخ کی جانب سے سے صرف فلپ دیمز اور پیٹرک ہیرمان ہی گول کرنے میں کامیاب ہو پائے۔

اس سے قبل دونوں ٹیموں کے درمیان یہ میچ اپنے مقررہ وقت میں صفر صفر پر ختم ہوا جبکہ دیے گئے اضافی وقت میں بھی کوئی ٹیم گول کرنے میں کامیاب نہ ہو پائی، جس کے بعد فیصلہ پنیلٹی شوٹ آؤٹس پر کرنے کا فیصلہ کیا گیا۔

میچ کے 84 ویں منٹ میں مؤنشن گلاڈباخ کو گول کرنے کا ایک اچھا موقع ملا، تاہم مارکو روئز کی جانب سے بال کو گول میں پہنچانے کی کوشش کو بائرن میونخ کے گول کیپر نوئیر نے ناکام بنا دیا۔

میچ جیتنے کے بعد میونخ کے گول کیپر نوئیر نے کہا کہ بہتر ہوتا کہ ان کی ٹیم پنیلٹی شوٹ آؤٹس کی نوبت نہ آنے دیتی اور میچ جیت لیتی، تاہم وہ پھر بھی خوش ہیں کہ وہ اپنی ٹیم کے ہمراہ ٹورنامنٹ کا فائنل کھیلنے برلن جا رہے ہیں۔نوئیر گزشتہ برس موسم گرما میں شالکے سے علیحدہ ہو کر بائرن میونخ میں شامل ہوئے تھے۔ گزشتہ برس وہ جرمن کپ جیتنے والی ٹیم شالکے کا حصہ تھے۔

میچ میں ناکامی کے بعد مؤنشن گلاڈباخ کے کوچ Lucien Favre نے کہا کہ ان کے لیے یہ ہار تسلیم کرنا اتنا آسان نہیں تاہم اس شکست کو تبدیل بھی نہیں کیا جا سکتا، یہی زندگی اور فٹبال ہے۔

اس ٹورنامنٹ کا فائنل 12 مئی کو برلن میں ہو گا۔ اس سے قبل ہونے والے ایک میچ میں بنڈس لیگا کی چیمپیئن ڈورٹمنڈ نے بنڈس لیگا کے دوسرے درجے کی چیمپیئن گوئتھر فؤرتھ کو اضافی وقت میں صفر کے مقابلے میں ایک گول سے شکست دے کر ایونٹ کے فائنل کے لیے کولیفائی کیا تھا۔

رپورٹ: عاطف توقیر

ادارت: امتیاز احمد