جرمن فائر بریگیڈ نے گٹر کے ڈھکن میں پھنسی گلہری کو بچا لیا

ڈورٹمنڈ میں فائر بریگیڈ کے شعبے کی طرف سے منگل 11 اپریل کے روز بتایا گیا کہ اسے سرخ رنگ کی اس گلہری کے ایک مین ہول کے ڈھکن میں پھنسے ہونے کی اطلاع ایک خاتون راہ گیر نے دی تھی۔

اس جانور کو وہاں پھنسے ہوئے دیکھ کر پہلے تو اس خاتون نے خود اسے رہائی دلانے کی کوشش کی، لیکن جب وہ کامیاب نہ ہو سکی تو اس نے ایمرجنسی نمبر پر فون کر کے فائر بریگیڈ کے عملے کو بلا لیا۔

یہ گلہری گٹر کے ڈھکن میں اتنی بری طرح پھنسی ہوئی تھی کہ عام طور پر بہت شرمیلا سمجھا جانے والا یہ ننھا سا جانور بہت چڑچڑا اور بدگمان ہو گیا تھا۔ فائر بریگیڈ کے جاری کردہ بیان کے مطابق اس خوف زدہ گلہری نے شروع میں اپنی مدد کرنے والی خاتون راہ گیر کو کاٹنے کی کوشش بھی کی تھی۔

اس پر خاتون نے عقل مندی یہ کی کہ اس نے اس جانور کو اپنی شال سے ڈھانپ دیا تاکہ وہ کچھ پرسکون ہو جائے اور اس کے بعد ہی اس نے ایمرجنسی نمبر پر کال کی تھی۔

فائر بریگیڈ کی مشکل

اطلاع ملنے پر فائر بریگیڈ کی ایک گاڑی تو فوراﹰ ہی موقع پر پہنچ گئی اور امدادی کارکنوں نے بڑی احتیاط سے مین ہول کا ڈھکن بھی اٹھا لیا تاکہ اس گلہری کو بچایا جا سکے۔

لیکن فائر بریگیڈ کے بیان کے مطابق، ''اس ننھے سے جانور کو رہائی دلانا اس لیے بہت پیچیدہ عمل ہو گیا تھا کہ یہ گلہری انتہائی بےصبری ہو چکی تھی اور اپنے بچانے والوں سے تعاون نہیں کر رہی تھی۔‘‘

لیکن پھر امدادی کارکنوں کی کوششیں کامیاب ہو ہی گئیں، اس گلہری کو زخمی ہوئے بغیر رہائی ملی تو ایک ہی لمحے میں وہ چھلانگیں بھرتی قریبی درختوں میں غائب ہو گئی۔

آسٹریلیا میں سینکڑوں کمیاب کوآلاز جنگلاتی آگ میں جل کر ہلاک

چار سال پہلے والی گلہری؟

ڈورٹمنڈ میں فائر بریگیڈ کے عملے کے لیے یہ پہلا موقع نہیں تھا کہ اس نے کسی مین ہول میں بنے سوراخ میں پھنسی کسی گلہری کی جان بچائی ہو۔ بالکل ایسا ہی ایک واقعہ 2019ء میں بھی پیش آیا تھا۔

تب امدادی کارکنوں کو مجبوراﹰ ایک ویٹرنری ٹیم کو بلانا پڑ گیا تھا، جس نے پہلے ٹیکہ لگا کر اس گلہری کو بے ہوش کیا تھا اور پھر اس رہائی دلا کر اس کو آنے والے معمولی زخموں پر دوائی بھی لگا دی تھی۔

فائر بریگیڈ نے اپنے بیان میں کہا، ''یہ واضح نہیں کہ آیا آج بچائی جانے والی گلہری وہی تھی، جسے بالکل اسی طرح کی تکلیف دہ صورت حال میں چار سال پہلے بھی بچایا گیا تھا۔‘‘

تاہم امدادی ٹیم کے ایک رکن کا کہنا تھا کہ گلہری، گٹر، ڈھکن، سوراخ میں پھنسا ہونا، خوف اور بےصبری، سب کچھ تو ویسا ہی ہے، شاید یہ وہی چار سال پہلے والی گلہری ہی تھی۔

م م / ع ا (رچرڈ کونر)