تھائی لینڈ، پارلیمان تحلیل، انتخابات دو فروری کو متوقع

پارلیمان کی تحلیل اور قبل از وقت انتخابات کا اعلان کرتے ہوئے خاتون وزیر اعظم نے ٹیلی وژن پر قوم سے خطاب میں کہا کہ موجودہ بحران کا بہترین حل یہ ہے کہ تھائی عوام سے ایک بار پھر جمہوری فیصلے کے لیے کہہ دیا جائے۔ وزیراعظم کا مزید کہنا تھا کہ انہوں نے یہ فیصلہ اس لیے کیا کیونکہ ’’حکومت نہیں چاہتی کہ تھائی لینڈ یا تھائی عوام مزید نقصانات اٹھائیں، کیونکہ تھائی لینڈ پہلے ہی بہت مشکلات اٹھا چکا ہے۔‘‘شناواترا کا کہنا تھا کہ انہوں نے اپنا فیصلہ تھائی لینڈ کے بادشاہ بھومی بول ادُلیادیج Bhumibol Adulyadej کو بطور سربراہ ریاست ان کی منظوری کے لیے بھجوا دیا ہے۔ تاہم ان کا کہنا تھا کہ ان کی کابینہ انتخابات کے انعقاد تک بطور عبوری حکومت کام کرتی رہے گی۔

قبل ازیں آج پیر نو دسمبر کو ایک لاکھ 40 ہزار کے قریب حکومت مخالف مظاہرین نے دارالحکومت بینکاک میں احتجاج کیا۔ وزیراعظم کی طرف سے پارلیمان کی تحلیل اور نئے انتخابات کے اعلان کے باوجود ان مظاہرین کی طرف سے احتجاج کا سلسلہ رُکا نہیں ہے۔ دارالحکومت میں حکومتی دفاتر کے باہر جمع ہونے والے مظاہرین اب مطالبہ کر رہے ہیں کہ حکومتی ذمہ داریاں غیر منتخب اور غیر جانبدار افراد کے حوالے کر دی جائیں۔

مظاہرین کے ترجمان تھاوورن سینیام Thaworn Senneam کا وزیراعظم کے اعلان کے بعد کہنا تھا، ’’یہ کافی نہیں ہے۔ ہم ان کے بطور عبوری حکومت ٹھہرنے کو قبول نہیں کر سکتے۔‘‘ اپوزیشن کی ڈیموکریٹک پارٹی کے سربراہ ابھیست ویجاجیوا نے کہا ہے کہ نئے الیکشن کا اعلان موجودہ سیاسی بحران کے حل کی طرف پہلا قدم ہے۔

حکومت کے خلاف کئی ہفتے قبل شروع ہونے والے مظاہروں کی قیادت حزب اختلاف کے رہنما سُوتِپ تُوک سوبان کرتے رہے ہیں۔ وزیراعظم کے اعلان کے بعد ان کا کہنا تھا کہ محض پارلیمان کی تحلیل ان مظاہروں کا مقصد نہیں تھا بلکہ اس تحریک کی خواہش ہے کہ ایک وزیراعظم منتخب کیا جائے جو نئےانتخابات سے قبل ’عوامی کونسل‘ اور عوامی حکومت قائم کرے۔

انتخابات کا انعقاد دو فروری کو متوقع

تھائی لینڈ میں آئندہ پارلیمانی انتخابات ممکنہ طور پر اگلے برس دو فروری کو منعقد ہوں گے۔ خبر رساں ادارے روئٹرز کے مطابق اس بات کا اظہار تھائی الیکشن کمیشن کے ایک اہلکار نے کیا۔ الیکشن کمیشن کے اہلکار سودری ستیاتھام Sodri Sattayatham کے مطابق، ’’اس بات کا بہت زیادہ امکان ہے کہ انتخابات دو فروری کو ہوں گے جو 60 دنوں میں انتخابات کرانے کی حد کے اندر ہے۔‘‘

تھائی لینڈ حکومت کے ترجمان کے مطابق پارلیمان کی تحلیل سے قبل کابینہ کے اجلاس میں نئے انتخابات کے لیے دو فروری کی تاریخ پر غور کیا گیا۔ تاہم حتمی طور پر تاریخ مقرر کرنے کے لیے ملکی الیکشن کمیشن کی جانب سے اس کی باقاعدہ طور پر توثیق ضروری ہے۔ تھائی لینڈ کے الیکشن کمیشن کی خاتون ترجمان جِن تھونگ اِنتاراسری Jinthong Intarasri کے مطابق الیکشن کمیشن کے حکام حکومت سے اس سلسلے میں اگلے چند دنوں کے دوران ملاقات کریں گے۔