تھائی لینڈ میں کشیدگی برقرار، ایمرجنسی نافذ

خبر رساں ادارے اے ایف پی کے مطابق وزیرِاعظم کی جانب سے ایمرجنسی کا نفاذ نیشنل سکیورٹی ایکٹ کے تحت حاصل اختیارات استعمال کرتے ہوئے کیا گیا ہے۔ مظاہرین وزیراعظم سے مستعفی ہونے کے لیے مطالبہ کر رہے ہیں۔

اس قبل مظاہرین نے ملکی وزارتِ خزانہ کی عمارت پر قبضہ کر لیا تھا۔ اس دوران وہاں سکیورٹی فورسز اور مظاہرین کے درمیان جھڑپوں کی بھی اطلاعات ملی تھیں۔ ان مظاہروں کو تھائی لینڈ میں سن 2010ء کے بعد سے ہونے والے سب سے بڑے مظاہرے قرار دیا جا رہا ہے۔

بینکاک سے موصولہ اطلاعات کے بعد وزیراعظم کی حمایت میں سینکڑوں لوگوں نے سرخ ٹی شرٹس پہن کر مظاہرہ بھی کیا۔

یِنگ لک نے پیر کے روز میڈیا سے گفتگو کرتے ہوئے کہا کہ وہ ان مظاہروں کے باوجود نہ تو خود استعفیٰ دیں گی اور نہ ہی ملکی پارلیمان تحلیل کریں گی۔ انہوں نے مظاہرین کی جانب سے وزارتِ خزانہ کی عمارت پر قبضے کی مذمت بھی کی۔

مظاہروں کی قیادت کرنے والے حزب اختلاف کے رہنما سُوتِپ تُوک سوبان نے مزید وزارتوں پر قبضہ کرنے کی دھمکی دی ہے۔ بنکاک میں حکومت کے خلاف اتوار کے روز بھی ایک بڑا مظاہرہ کیا گیا تھا۔

تھائی لینڈ میں نیشنل سکیورٹی ایکٹ کے تحت وزیراعظم کو یہ اختیار حاصل ہے کہ وہ نقصِ امن کے خطرات کے پیشِ نظر نقل و حمل کو محدود بنانے کے علاوہ لوگوں کے ہر طرح کے اجتماعات پر پابندی عائد کرسکتا ہے۔

ایمرجنسی کے نفاذ کے وقت وزیر اعظم یِنگ لک شناواترا کا کہنا تھا کہ وہ پُر امید ہیں کہ ان کے ملک میں جاری اِن مظاہروں میں تشدد کا عنصر ہر گز شامل نہیں ہوگا: ’’ میں امید کرتی ہوں کہ لوگ ان غیر قانونی مظاہروں میں شریک نہیں ہوں گے۔‘‘

پیر کے روز حتمی طور پر ایمرجنسی کے نفاذ کا فیصلہ اس وقت کیا گیا، جب یہ خبریں سامنے آئیں کہ کم از کم تیس ہزار افراد کا ایک جمِ غفیر مزید سرکاری املاک پر قبضے کے لیے آگے بڑھ رہا ہے۔

مظاہروں کی قیادت کرنے والے اپوزیشن رہنما سُوتِپ تُوک سوبان نے مظاہرین کو ہر طرح کی توڑ پھوڑ اور غیر قانونی حرکات سے باز رہنے کی ہدایت کی ہے۔

اپوزییشن کا الزام ہے کہ یِنگ لک کی حکومت اصل میں اُن کے بھائی سابق وزیرِ اعظم تھاکسن شناواترا چلا رہے ہیں۔ تھاکسِن ان دنوں جلاوطنی کی زندگی گزار رہے ہیں۔ وہ سن 2001ء سے سن 2006ء تک ملک پر حکومت کرتے رہے ہیں۔ ان کی حکومت کو بد عنوانی کے الزامات کے تحت فوج کی جانب سے برطرف کر دیا گیا تھا۔

موجودہ وزیر اعظم یِنگ لک شناواترا سن 2011ء میں برسرِاقتدار آئی تھیں۔ تاہم انہیں شروع سے ہی ان الزامات کا سامنا رہا کہ ان کی حکومت اصل میں اُن کے بھائی چلا رہے ہیں۔

حالیہ مظاہرے موجودہ حکومت کی جانب سے تھاکسِن کو حکومت کی جانب سے عام معافی دیے جانے کی ایک کوشش کے بعد سے شروع ہوئے ہیں۔ تاہم مظاہروں کے بعد تھائی حکومت نے سیاسی استثنا کا یہ بل واپس لے لیا تھا۔

اتوار کے روز ملکی اپوزیشن نے حکومت کے خلاف بھر پور طاقت کا مظاہرہ کیا تھا۔ اس مظاہرے میں ایک محتاط اندازے کے مطابق ایک لاکھ سے زائد مظاہرین نے شرکت کی تھی۔