تھائی لینڈ، مظاہرین کا وزارت خزانہ پر قبضہ

تھائی لینڈ میں حکومت کے خلاف اتوار کے روز ایک بڑا مظاہرہ کیا گیا جس میں لاکھوں افراد نے شرکت کی۔ پولیس کے مطابق بنکاک میں ہونے والے اس مظاہرے میں ایک لاکھ سے زائد افراد شریک تھے۔ مظاہرین وزیراعظم یِنگ لک شناواترا سے مستعفی ہونے کا مطالبہ کر رہے تھے۔ منتظمین کا دعویٰ ہے کہ گزشتہ روز کے احتجاج میں شامل افراد کی تعداد چار لاکھ تھی۔ 2010ء کے بعد تھائی لینڈ میں ہونے والا یہ سب سے بڑا مظاہرہ تھا۔ 2010ء میں ہونے والے پر تشدد احتجاجی مظاہروں کے نتیجے میں 90 سے زائد افراد ہلاک ہوئے تھے۔

وزیراعظم یِنگ لک شناواترا کی حکومت کے خلاف احتجاج کرنے والے مظاہرین آج پیر کے روز وزارت خزانہ کی عمارت میں داخل ہو گئے۔ مظاہروں کی قیادت کرنے والے حزب اختلاف کے رہنما سُوتِپ تُوک سوبان Suthep Thaugsuban نے مزید وزارتوں پر قبضہ کرنے کی دھمکی دی ہے: ’’کل (منگل) ہم مزید وزارتوں پر قبضہ کریں تاکہ حکومت کو بتایا جا سکے کہ انہیں ملک چلانے کی اب مزید قانونی حیثیت حاصل نہیں رہی۔‘‘

اتوار 24 نومبر کو حکومت مخالف مظاہرے کے بعد بنکاک میں پچاس ہزار کے قریب حکومت کے حامیوں نے بھی سرخ ٹی شرٹس پہن کر وزیراعظم شناواترا کے حق میں نعرے بازی کی۔ بنکاک پولیس کے مطابق ایک فٹبال اسٹیڈیم میں منعقد کی جانے والی اس ریلی کا مقصد موجودہ حکومت کو اپنی حمایت کا یقین دلانا تھا۔

پولیس کے مطابق وزیراعظم شناواترا کی منتخب شدہ حکومت کے خلاف احتجاج کرنے والے 30 ہزار سے زائد مظاہرین نے دارالحکومت میں ایک درجن سے زائد ریاستی اداروں کی جانب مارچ کیا۔ ان میں پولیس اور فوج کے ہیڈکوارٹرز کے علاوہ مختلف ٹیلی وژن اسٹیشنز بھی شامل ہیں۔

خبر رساں ادارے اےا یف پی کے مطابق مطابق اپوزیشن رہنما رہنما سُوتِپ تُوک سوبان کی قیادت میں سینکڑوں مظاہرین وزارت خزانہ کے کمپاؤنڈ میں داخل ہو گئے اور انہوں نے وہاں مختلف عمارات پر قبضہ کر لیا ہے۔

حکومت مخالف حالیہ مظاہروں کا سلسلہ گزشتہ ماہ اس وقت شروع ہوا جب حکومت حمایت سے ایک ایمنسٹی بِل پارلیمان میں پیش کیا گیا جس کے نتیجے میں خاتون وزیر اعظم یِنگ لُک شناواترا کے بھائی اور سابق وزیر اعظم تھاکسن شناواترا سزا کا سامنا کیے بغیر ملک میں واپس لوٹ سکتے ہیں۔ 2006ء میں ان کی حکومت بدعنوانی کے الزامات پر ختم کر دی گئی تھی۔

دوسری طرف وزیراعظم ینگ لُک نے آج پیر کے دن میڈیا سے گفتگو کرتے ہوئے کہا ہے کہ وہ ان مظاہروں کے باوجود نہ تو خود استعفیٰ دیں گی اور نہ ہی ملکی پارلیمان تحلیل کریں گی۔