تحریک طالبان پاکستان کے ساتھ مذاکرات کی ایک اور پیشکش

پاکستانی حکومت نے قیام امن کے لئے کالعدم تحریک طالبان پاکستان کو ایک مرتبہ پھر مذاکرات کی پیشکش کا اعادہ کیا ہے۔ ماضی کے بر عکس اس مرتبہ وفاقی وزیر داخلہ چوہدری نثار نے نسبتا سخت رویہ اپناتے ہوئے کہا ہے کہ مذاکرات کا راستہ نہ اپنانے والوں کے خلاف جنگ کی جائے گی۔ حکومت کی جانب سے یہ پیشکش ایک ایسے موقع پر کی گئی ہے جب شدت پسندوں نے کراچی ، پشاور اور شانگلہ میں سیاستدانوں اور اہم سرکاری افسران کو نشانہ بنایا ہے۔

اس صورتحال نے حکومت کے لئے مشکلات میں بھی اضافہ کردیا ہے۔ حکومتی عہدیدار ایک جانب طالبان کے ساتھ مذ اکرات کو ترجیح دینے کی پالیسی پر عمل پیرا ہیں تو دوسری جانب طالبان کے ساتھ مذاکرات نہ کرنے کی حامی مذہبی اور سیاسی جماعتیں بھی مسلسل دباؤ بڑھا رہی ہیں۔

ان مذہبی جماعتوں میں سے اکثر کا تعلق بریلوی اور شیعہ مکتبہ فکر سے ہے۔ان جماعتوں کا مؤقف ہے کہ طالبان مذاکرات کی زبان نہیں سمھجتے اسی لئے ان کے خلاف فیصلہ کن کاروائی کی جائے۔

حکومت کے پاس اس وقت طالبان کے ساتھ مذاکرات کو ترجیح دینے کے حق میں جو سب سے اہم دلیل ہے وہ کل جماعتی کانفرنس کی متفقہ قرارداد ہے جس میں تمام سیاسی جماعتوں نے امن کو ایک موقع دینے پر اتفاق کیا تھا۔ تاہم اب اے این پی، ایم کیوایم اور پیپلز پارٹی کے بعض راہنماؤں کا کہنا ہے کہ حکومت کی جانب سے طالبان کے بارے میں کسی فیصلے پر پہنچنے سے تاخیر کے سبب دہشت گردوں کے ہاتھوں جانی اور مالی نقصان اٹھانا پڑ رہا ہے۔

پیپلزپارٹی کے راہنما اور سابق گورنر کے پی کے بیرسٹر مسعود کوثر نے ڈی ڈبلیو سے بات کرتےہوئے کہا کہ :

"پہلے سے زیادہ موجودہ حکومت کے دور میں ابہام پیدا ہوا ہے جس کا کافی نقصان ہورہا ہے میں سمھجتا ہوں کہ جو بھی صورتحال ہے اس کا تقاضہ یہ ہے کہ تاخیر کرنے کے بجائے اس پر فوری عمل کیا جائے تاکہ لوگوں کو پتہ چل سکے کہ اس آپشن کا کوئی فائدہ ہے یا دوسرے آپشن کا کوئی فائدہ ہے۔"

موجودہ حکومت نے اقتدار میں آنے کے بعد طالبان کے ساتھ مذاکرت کرنے کے لئے تمام جماعتوں کو اعتماد میں لیا تھا۔ تاہم ان مذاکرات میں قابل زکر پیشرفت ہونے سے قبل ہی ٹی ٹی پی کا سربراہ حکیم اللہ محسود گزشتہ سال یکم نومبر کو امریکی ڈرون میزائل حملے میں مارا گیاتھا۔ حکیم اللہ کی ہلاکت کے بعد مولوی فضل اللہ کو تحریک طالبان کا نیا امیر مقرر کیا گیا۔ سخت گیر فضل اللہ نے حکومت کے ساتھ کسی قسم کے مذاکرات سے انکار کر دیا۔

اے این پی کے راہنما ء سینیٹر افراسیاب خٹک کا کہنا ہے کہ حکومت ابھی تک یہ فیصلہ نہیں کر پائی کہ اس نے دہشتگردی کو ختم کرنا ہے یا ریاست کو ان کے تابع بنانا ہے۔ افراسیاب خٹک نے کہا کہ ،"بظاہر تو ایسا لگ رہا ہے کہ یہ (حکومت)جیسے ان (طالبان) کو راضی رکھنے پر تلی ہوئی ہے اور ظاہر ہے کہ دہشت گردوں کو راضی رکھنے کی قیمت پاکستانی ریاست کو بعد میں چکانی پڑے گی۔ اگر وہ اسی طرح سے طاقت پکڑ لیں گے تو کل کو پاکستانی ریاست کیا کرے گی کیونکہ وہ تو اب تک متوازی ریاست بنانے پر اصرار کر رہے ہیں۔ تو فیصلہ یہ ہونا ہے کہ ہم نے اس ریاست کو بچانا ہے یا نہیں۔"

پاکستانی وزیر داخلہ کا کہنا ہے کہ طالبان کے مختلف دھڑوں کے ساتھ بات چیت جاری ہے اور امید ہے کہ اس کے اچھے نتائج سامنے آئیں گے۔ ادہر تحریک طالبان پاکستان نے ابھی تک حکومت کی جانب سے مذاکرات کی تازہ پیشکش پر رد عمل کا اظہار نہیں کیا ۔البتہ تجزیہ کاروں کا کہنا ہے کہ طالبان سربراہ مولوی فضل اللہ کی موجودگی میں حکومت کو مثبت ردعمل ملنے کے امکانات کم ہیں۔